გუბერნიის თანამშრომელი სამსახურეობრივი მანქანით ავარიაში მოყვა

შემთხვევა, 20 ივნისს, დაახლოებით 18:00 საათზე ასპინძაში, სოფელ საროსთან მოხდა. ამ დროს გუბერნატორის ადმინისტრაციის ადგილობრივი თვითმმართველობის ორგანოებთან ურთიერთობის სამსახურის წარმომადგენელი ვახტანგ მერაბიშვილი ექსპედიციის ფარგლებში გამართული ღონისძიების შემდეგ, საროდან ახალციხის მიმართულებით მოდიოდა. იგი “Toyota LG 1OO” მარკის ავტომანქანით, რომლის სახელმწიფო ნომრებიცაა HBH-040, მოცურდა, გზის სავალი ნაწილიდა გადავიდა და ამობრუნდა. მერაბიშვილი მანაქანაში მარტო იჯდა.

სამცხე–ჯავახეთის გუბერნატორის მოადგილის გიორგი მიქელაძის თქმით, შემთხვევის შედეგად მერაბიშვილი არ დაშავებულა. მასთან დაკავშირება „სამხრეთის კარიბჭემ“ არა ერთხელ სცადა, თუმცა, ჩვენ სატელეფონო ზარებს მერაბიშვილმა არ უპასუხა. გუბერნიის საზოგადოებასთან ურთიერთობის სამსახურში კი გვითხრეს, რომ ამ დროისთვის ვახტანგ მერაბიშვილი ისევ ასპინძაშია და ექსპედიციაში მონაწილეობას აგრძელებს.

„მანქანა საჯარიმოზე არ გადაუყვანიათ, რადგან მას საგზაო მოძრაობის წესები არ დაურღვევია, გზაზე ნაწვიმარი იყო და იმიტომ მოსრიალდა. სადაზღვევო კომპანიას დავუკავშირდით და ისინი მიხედავენ ყველაფერს“, – ამბობს გიორგი მიქელაძე.

“Toyota LG 1OO”, სახელმწიფოს რწმუნებულის აპარატიდან, 2017 წელს „სამხრეთის კარიბჭის“ მიერ გამოთხოვილი ინფორმაციის მიხედვით, გუბერნიას 2010 წელს არასამთავრობო ორგანიზაცია „მერსი ქორფსმა“ უსასყიდლოდ გადასცა. ავტომანქანას „სოციალური ჭრების ფარქლებში მოსახლეობის მიერ მოთხოვნილი რესურსის საჭიროების შესწავლის მიზნით“ შექმნილი კომისია სამსახურეობრივი უფლებამოსილებების განსახორციელებლად იყენებდა.

შინაგან საქმეთა სამინისტრომ მძღოლი ადმინისტრაციულ სამართალდარღვევათა კოდექსის 125–ე მუხლის 10–ე პუნქტის მიხედვით დააჯარიმა. აღნიშნული მუხლი საგზაო მოძრაობის წესების დარღვევას გულისხმობს.




სამცხე–ჯავახეთის სამხარეო ადმინისტრაციის თანამშრომლები, გუბერნატორის მოადგილესთან და სტუდენტებთან ერთად, სოფელ საროში ორ დღიანი ექსპედიციის ფარგლებში იმყოფებოდნენ. ექსპედიციის მონაწილეები ისტორიულ ძეგლებს, ასევე, ინფრასტრუქტურულ პროექტებს ათვალიერებენ. ღონისძიების დასრულების შემდეგ სტუდენტებმა ასპინძის მუნიციპალიტეტის განვითარებისთვის საპროექტო წინადადებები უნდა მოამზადონ. ამას კი რეგიონის განვითარების გრძელვადიან გეგმაში გაითვალისწინებენ.

[ლუბა გიორგაძე, ასპინძა]