ახალციხის გამგებელი სამსახურეობრივი მანქანით ავარიაში მოყვა

საჯარიმოზე მდგარი "ტოიოტა პრადო"

ავტოსაგზაო შემთხვევა, ახალციხის მუნიციპალიტეტის სოფელ მუგარეთთან, 15 ივნისს, 13:10 საათზე მოხდა. გამგეობის ბალანსზე რიცხულ შავი ფერის „პრადოს“, სახელმწიფო ნომრით CG – 747 – GC, „ტოიოტას“ მარკის ავტომობილი დაეჯახა.

ახალციხის მუნიციპალიტეტის გამგებელი ზაზა მელიქიძე აგარის მიმართულებით მიდიოდა, საჭესთან მისი მძღოლი გიორგი პაპიძე იჯდა.

გამგებლის თქმით, შემხვედრი მიმართულებით მოძრავი, „ტოიოტას“ მარკის, მარჯვენასაჭიანი მანქანა "ტრაილერის" გასწრებას ცდილობდა, საპირიპიროდ მიმავალი „პრადო“ ვერ შენიშნა და დაეჯახა.

„ტრაილერს" ააცილა, მაგრამ ჩვენ დაგვეჯახა და დაგვაზარალა. უმნიშვნელო ნაკაწრი მაქვს, კარგად ვარ“, – ამბობს სატელეფონო საუბარში ზაზა მელიქიძე.

თუმცა, როგორც სოფელ მუგარეთში მცხოვრებლები „სამხრეთის კარიბჭესთან“ ყვებიან, გამგებელმა დაზიანება თავის არეში მიიღო.

მელიქიძე მესამე დღეა ბიულეტენზე იმყოფება. ამბობს, რომ თავს კარგად გრძნობს და ორშაბათიდან სამსახურში გავა.

გამგებლისგან განსხვავებით, მის მძღოლს ბიულეტენი არ აუღია. „კარგად ვარ, არაფერი დამშავებია“, – ამბობს გიორგი პაპიძე.

მისი თქმით, აბსოლუტურად უვნებლად გადარჩა „ტოიოტას“ მარკის ავტომობილში მჯდომი ორი ადამიანიც: „შეშინებული იყვნენ ძალიან, სხვა არაფერი დაშავებიათ“.

პაპიძე ამბობს, რომ გამოძახებული სასწრაფოს მომსახურება აღარ დასჭირვებიათ: „ყველა კარგად ვიყავით, ამიტომ სასწრაფო ჩვენამდე აღარ მოსულა“.

გამგებლის თქმით, შემთხვევისთანავე 112–ზე თავად დარეკეს: „შესაბამისი სამსახურების წარმომადგენლები მოვიდნენ და ყველაფერი ისე გააკეთეს, როგორც საჭირო იყო“.

მომხდარს შსს სსკ–ის 276–ე მუხლის პირველი ნაწილით იძიებს, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც ჯანმრთელობის ნაკლებად მძიმე დაზიანება გამოიწვია.

ამ დროისთვის გამგეობის სამსახურეობრივი მანქანა საჯარიმო ავტოსადგომზე დგას. შეკითხვაზე: მოუწევს თუ არა მუნიციპალიტეტისთვის მიყენებული ზარალის ანაზღაურება „ტოიოტას“ მარკის ავტომობილის მძღოლს, მელიქიძე გვპასუხობს: „ჯერ არაფერი ვიცი, მიმდინარეობს გამოძიება“.

ახალციხის მუნიციპალიტეტის გამგეობამ მანქანის შესყიდვაზე ტენდერი 2015 წლის 24 დეკემბერს გამოაცხადა. შესყიდვის სავარაუდო ღირებულება 50 000 ლარი გალხდათ. გამგეობამ მანქანა 49 800 ლარად შეიძინა.


ავტოსაგზაო შემთხვევის ადგილი


ავტოსაგზაო შემთხვევის ადგილი

[თამუნა უჩიძე, ახალციხე]