სამცხე–ჯავახეთში ფეხბურთის ჩემპიონატი 'მოყვარულთა თასი' იწყება

დღეს, 20 ივნისს, 14:00 საათზე საქართველოს სამოყვარულო ფეხბურთის ასოციაციის ვიცე პრეზიდენტი ლაშა ჩალაძე, სამცხე–ჯავახეთის საფეხბურთო კლუბების წარმომადგენლებს შეხვდა. სპეციალურად ჩემპიონატისათვის, კლუბების წევრებს ფეხბურთის სამ–სამი ბურთი გადაეცათ.

საფეხბურთო სამოყვარულო კლუბებს შორის, ჩემპიონატი პირველ ივლისს დაიწყება და ოქტომბრამდე გააგრძელდება. მასში მონაწილეობას რვა გუნდი მიიღებს. ისინი სულ 14 მატჩს გამართავენ. საბოლოოდ, სამი გამარჯვებული გუნდი გამოვლინდება, რომლებიც ფინალურ ეტაპზე, მთელი საქართველოს მასშტაბით შერჩეულ 32 გუნდთან ერთად ითამაშებენ. ფინალში გამარჯვებული გუნდი 4 000 ლარს მიიღებს, ხოლო მეორე ადგილოსანი 2 500 ლარს.

გარდა ამისა, ფინალში გამარჯვებული გუნდი, ევროპული ფეხბურთის ასოციაციის კავშირის(უეფა) მიერ გამართულ რეგიონთაშორის ტურნირზე გაემგზავრება.

"გვინდა, რომ უფრო მეტმა ახალგაზრდამ დაიწყოს ფეხბურთის თამაში. ახალგაზრდები უნდა დაინტერესდნენ ფეხბურთით და მიეჩვივნონ ჯანსაღი ცხოვრების წესს. წელს პირველად, გასული წლის გამარჯვებული ფოთის გუნდი ევროპის რეგიონთა თასზე გაემგზავრა და იქ ევროპის გუნდებთან ითამაშა", – განმარტავს საქართველოს სამოყვარულო ფეხბურთის ასოციაციის ვიცე–პრეზიდენტი ლაშა ჩალაძე.



[მარიამ ბარძიმაძე, ახალციხე]