ახალციხის ქუჩებში ორმოები ისევ პრობლემაა

ქალაქ ახალციხის მცხოვრებელები დაზიანებული სავალი გზის შესახებ ჩივიან. მათი თქმით, გზაზე გაჩენილი ორმოების გამო, ავტომანქანები ზიანდება, გადაადგილებსას კი მძღოლებს პრობლემა ექმნებათ.

"პრობლემა ის არის, რომ მანქანები იმტვრევა. რამდენჯერ შევცვალე მაგრამ ამორტიზატორები აღარ ვარგა. გინდა სოფელში გივლია და გინდა ამ გზებზე", – ამბობს ახალციხელი ფრიდონ მაისურაძე.

უყურადღებობაზე ჩივის გია კაჭკაჭაშვილი. მისი თქმით, გადათხრილი ქუჩები ფეხით მოსიარულეებისთვისაც სახიფათოა – "აბა ფეხი ჩაუვარდეს ვიღაცას "იამკაში", რა დაემართება. არაფერი კარგი, ხომ?! აი მაგ დღეში ვართ ახლა. ყურადღებას არავინ არ გვაქცევს".

ახალციხის მცხოვრები იზა გოგოლაური მიიჩნევს, რომ შეუკეთებელი ორმოებისა და დაზიანებული გზის სავალი ნაწილის გამო, ქალაქის ქუჩებში ძლიერი მტვერი დგება – "ახალციხისათვის მოუშორებელ პრობლემად იქცა ეს გადათხრილი და სილაჩაყრილი გზები. დღე გარეთ ვერ გამოხვალ, მთელი ქალაქი მტვერს მიაქვს. ბავშვების გასეირნებაზე ხომ ლაპარაკი ზედმეტია. მთელი დღე შინაპატიმრობაში ვართ".

ახალციხის ქუჩებში არსებულ ორმოებს, "ანაფრეზით" კომპანია "ოცხე" ავსებს. "ორმოები რომ არ იყოს, დროებით ღონისძიებას ვატარებთ და ანაფრეზით ვავსებთ", – განმარტავს კომპანიის დირექტორი ოთარ ჩილინგარაშვილი.

გზების სრულყოფილი რეაბილიტაციისათვის ახალციხის მერია ახალი ტენდერის გამოაცხადებას გეგმავს.

"კომპანია "ოცხე" მხოლოდ და მხოლოდ ქალაქში ახორციელებს მოფრეზვით სამუშაოებს და ორმულ შეკეთებას. კომპანიას არ აქვს ვალდებულება ასფალტის გადაგებაზე", – ამბობენ ახალციხის მერიის საზოგადოებასთან ურთიერთობის სამსახურში.

ამ ეტაპზე, შპს "ოცხე" ორმოებს „ანაფრეზით“რამდენიმე ქუჩაზე ავსებს. ესენია კოსტავას, თაბუკაშვილის,სულხან–საბას, ასპინძის, რუსთაველისა და 9 აპრილის ქუჩები.

რა თანხა დაჯდება ქუჩების ორმული შეკეთება ცნობილი არ არის. მერიაში განმარტავენ, რომ ახალი ტენდერის გამოცხადების შემდეგ, ახალციხის ცენტრალური ქუჩებზე გზის საფარი მთლიანად შეიცვლება.



[თორნიკე ზაზაძე, ახალციხე]