ახალციხის მერია: ‘გზებზე ორმოების შეკეთება წვიმების გამო ვერ მოესწრო’

დაზიანებული ადგილების გამო ახალციხის ცენტრალურ და შიდა ქუჩებზე ხშირად საცობები იქმნება. განსაკუთრებით რთული გადაადგილება კოსტავას, რუსთაველის, ცხრა აპრილისა და ასპინძის ქუჩებზეა.

გზების ორმული შეკეთება შპს „დავითს“, ახალციხის მერიასთან გაფორმებული ხელშეკრულების მიხედვით, გუშინ, სამ აპრილს უნდა დაესრულებინა. თუმცა, ვადა ისე ამოიწურა, რომ არა ერთ ქუჩაზე ორმოები ისევ რჩება.

„მერიასთან პროგნოზული შეთანხმება მქონდა, რაც იმას ნიშნავს, რომ რასაც მერია დამიკვეთავდა, იმას ვაკეთებდი. არ მქონდა უფლება გზებზე იმაზე მეტი გამეკეთებინა ვიდრე დამავალებდნენ. მერია თანხასაც სამუშაოს შესაბამისად მირიცხავდა“, – ამბობს შპს „დავითის“ გენერალური დირექტორი დავით კეღოშვილი.

მისმა კომპანიამ ახალციხის მერიის მიერ გამოცხადებულi ტენდერი 63 541 ლარით მოიგო, ამ თანხით შპს „დავითს“, სამი იანვრიდან სამ აპრილამდე. გზების მოვლა–შენახვაზე უნდა ეზრუნა, თუმცა, ვადა ისე გაუვiდა, რომ მხოლოდ 36 379 ლარი, ანუ 57.25% აითვისა.

ახალციხის მერიაში შეკითხვებზე, თუ რატომ არ დაავალეს კომპანიას გზების ორმული შეკეთება და რატომ დარჩა თანხის ნახევარი ასათვისებელი, გვპასუხობენ: „თანხის ოდენობა თავიდანვე იმის მიხედვით გავითვალისწინეთ, რომ ზამთარში საჭიროების შემთხვევაში სათანადოდ გაგვეხარჯა და პრობლემები არ შეგვქმნოდა. წელს მკაცრი ზამთარი არ იყო, ამიტომ, მაგალითად, სკვერებისა და ქვაფენილების მოვლა–პატრონობისთვის თანხა არ გახარჯულა და ასათვისებელი ამიტომ დარჩა“.

რაც შეეხება ავარიულ გზებს, მერიაში ამბობენ, რომ მათი გაკეთება უამინდობის გამო ვერ მოხერხდა: „ერთდროულად ვერ შეკეთდება, დრო სჭირდება. გარემოპირობებმა შეგვიშალა ხელი, წვიმები იყო და გზების შეკეთება ამიტომ ვერ მოესწრო“.



ახალციხეში გზების ორმულ შეკეთებაზე პასუხისმგებლობას ახალი კომპანია შპს „ოცხე“ ჩაიბარებს. მან მუნიციპალიტეტის მერიის მიერ ცხრა მარტს გამოცხადებული ტენდერი 100 000 ლარით მოიგო. თუმცა, ჯერ კომპანია სამუშაოების განხორციელებას ვერ დაიწყებს, რადგან მასთან ხელშეკრულება არ გაფორმებულა.

ახალციხის მუნიციპალიტეტის მერია ქალაქის ცენტრალურ ქუჩების კაპიტალურ რემონტს ჯერ არ გეგმავს. მიმდინარე წლის ბიუჯეტში ამისთვის თანხა გათვალისწინებული არაა. მძღოლები კი ფიქრობენ, რომ ავარიული გზები ორმული შეკეთების შემდეგ მალევე ზიანდება, ამიტომ კაპიტალური რემონტი სჭირდება.



[მარიამ ბარძიმაძე, ახალციხე]