ბორჯომის სოფლები ისევ დაისეტყვა

სეტყვა და წვიმა დღეს ბორჯომის მუნიციპალიტეტის სოფლებში: ცემში, ტბასა და წაღვერში განმეორდა. როგორც ადგილობრივ თვითმმართველობაში განმარტავენ, ნალექი დიდი რაოდენობის არ იყო, ამიტომ მას სავალალო შედეგები არ გამოუწვევია. წვიმის შედეგად ჩამოტანილ მიწას გზებზე ამ წუთებში სპეციალური ტექნიკა წმენდს.

„გზაზე მოდის ცოტა ნიაღვარი, დარჩენილია შლამი, მაგრამ ეს ტრანსპორტის გადაადგილებას ხელს არ უშლის. ვითარება კონტროლს ექვემდებარება. ახლა ჩვენ წაღვერში ვართ და აქ ტექნიკა მუშაობს გზის გასაწმენდად. პანიკის საბაბი არ არის“, – განუცხადეს „სამხრეთის კარიბჭეს“ ბორჯომის მუნიციპალიტეტის გამგეობის საზოგადოებასთან ურთიერთობის სამსახურში.

შეგახსენებთ, გუშინ ბორჯომში ძლიერი წვიმა და სეტყვა იყო, რამაც პრობლემები შექმნა. ბორჯომში სტიქიის შედეგების სალიკვიდაციო სამუშაოები დღეს დილიდან მიმდინარეობს.

[თაკო ფეიქრიშვილი, ბორჯომი]