სამცხე–ჯავახეთის მუზეუმში ძველსა და ჭობარეთში აღმოჩენილ ჭურჭელს გამოფენენ

ახალციხის ციხეზე, სამცხე–ჯავახეთის ისტორიულ მუზეუმში სარემონტო სამუშაოები იწყება. რის გამოც მუზეუმი ექვსი ივნისიდან პირველ ივლისამდე დამთვალიერებლებს ვერ მიიღებს. მუზეუმის დირექტორის, ციური ლაფაჩის განმარტებით საგამოფენო დარბაზში, თითქმის 50% ახალი ექსპონატები გამოიფინება. ეს იქნება ის ჭურჭელი, რომელსაც სამცხე–ჯავახეთის მოსახლეობა ადრე, შუა და გვიან ბრინჯაოს ხანაში იყენებდა.

„ამავე პერიოდის ექსპონატები ჩვენ მუზეუმში აქამდეც გვქონდა, თუმცა ფრაგმენტულად და მისი აღქმა ძალიან ძნელი იყო. ახლა იგივე ჭურჭელი იქნება სრული სახით წარმოდგენილი. ფრაგმენტებს საგამოფენო დარბაზიდან ავიღებთ, სხვა ადგილზე განვათავსებთ, მათ ადგილზე კი ახალ ექსპონატებს დავაწყობთ:, – ამბობს ციური ლაფაჩი.

ძველი ბრინჯაოს ხანის პერიოდის ჭურჭელი, 2016–2017 წლებში საქართველოს ეროვნული მუზეუმისა და „ბი–პის“ ინიციატივით ჩატარებული არქეოლოგიური გათხრების შედეგად, ასპინძის სოფლებში ძველსა და ჭობარეთში ნასახლარებში აღმოჩნდა.
სარემონტო სამუშაოები მუზეუმში სწორედ ახალი ექსპონატების გამოფენისთვის ვიტრინების შესაცვლელად იწყება. ასევე, შენობაში შეიცვლება ელექტროგაყვანილობა.

„საგამოფენო დარბაზში თითოეული ექსპონატი დაინომრება და მათი აღწერილობა ვიტრინის შიგნით განთავსდება. აქამდე გარედან ეწერა, დანომრილიც არ იყო და დამთვარიელებლი კარგად ვერ აღიქვამდა ესა თუ ის ინფორმაცია რომელ ექსპონატს ეკუთვნოდა“, – ამბობს ლაფაჩი.

სამცხე–ჯავახეთის ისტორიული მუზეუმი განახლებული ექსპონატებით დამთვალიერებელს ივლისიდან უმასპინძლებს.

[ლუბა გიორგაძე, ახალციხე]