სამცხე–ჯავახეთის მუზეუმს 300–მდე ახალი ექსპონატი შეემატა

ახალი საგამოფენო სივრცე დღეს, 11 ივლისს საქართველოს ეროვნული მუზეუმის გენერალურმა დირექტორმა დავით ლორთქიფანიძემ გახსნა. გახსნის ცერემონიას „ბრითიშ პეტროლიუმის“ გენერალური დირექტორი კრის შლიტერი, ახალციხისა და ტაო–კლარჯეთის მიტროპოლიტი თეოდორე ჭუაძე, ახალციხის მერი ზაზა მელიქიძე, რეგიონის გუბერნატორის მოადგილე გიორგი მიქელაძე და სამცხე–ჯავახეთის უნივერსიტეტის თანამშრომლები ესწრებოდნენ.

„მუზეუმი განახლდა ტექნოლოგიურად, ასევე, დაემატა ახალი ექსპონატები. ეს ყველაფერი ძირითადად „BP”–ის დახმარებით გაკეთდა“, – ამბობს დავით ლორთქიფანიძე.

ახალი საგამოფენო სივრცის მოწყობა, 2015–2016 წლებში ადიგენში, სოფელ ორჭოსანში სამხრეთ კავკასიის მილსადენის გაფართოების პროექტის (SCPX) მშენებლობის დროს ჩატარებულმა არქეოლოგიურმა გათხრებმა განაპირობა.

„არქეოლოგიური გათხრების დროს აღმოჩნდა ძალიან მნიშვნელოვანი მასალა, რომელიც უკვე აქ არის წარმოდგენილი, ამას ასევე, თბილისიდან, ჩვენი საცავებიდან დაემატა კიდევ სხვა ექსპონატები. მთლიანად მუზეუმი წარმოადგენს, როგორც მხარის ისტორიას, ისე მთლიანად საქართველოს ისტორიას და ეს არის ერთ–ერთი უმნიშვნელოვანესი კულტურულ საგანმანათლებლო ცენტრი,“ – აცხადებს ლორთქიფანიძე.

ახლადაღმოჩენილი ექსპონატებისთვის საგამოფენო სივრცე "ბრითიშ პეტროლიუმის" ფინანსური მხარდაჭერით მოეწყო.

"ძალიან დიდი სიხარულია ჩემთვის, რომ ჩვენ, როგორც კომპანიას შეგვიძლია გავხდეთ ნაწილი იმ დიდი კვლევებისა, გამოფენებისა და კულტურული ცხოვრებისა, რომელიც საქართველოშია", – ამბობს კრის ლიტერი.





[თორნიკე ზაზაძე, ახალციხე]