სამცხე–ჯავახეთის მუზეუმში ხვალ ახალი საგამოფენო სივრცე გაიხსნება

ახალი საგამოფენო სივრცის მოწყობა, 2015–2016 წლებში ადიგენში, სოფელ ორჭოსანში სამხრეთ კავკასიის მილსადენის გაფართოების პროექტის (SCPX) მშენებლობის დროს ჩატარებულმა არქეოლოგიურმა გათხრებმა განაპირობა.

მაშინ აქ აღმოაჩინეს ნეოლითის ხანის (ძვ.წ. 37-35 სს) ორჭოსანის ნამოსახლარი. ამიტომ გადაწყდა, რომ მუზეუმში წარმოედგინათ საქართველოს ის პერიოდი, როდესაც ძლიერდება მესხეთის მოსახლეობის კავშირი შუამდინარეთისა და მახლობელი აღმოსავლეთის კულტურებთან.

ამ აღმოჩენით ნათლად გამოიკვეთა კავკასია, ანატოლია, ირანისა და მესოპოტამიის ნეოლითური ხანის კულტურებში საქართველოს როლი და მნიშვნელობა. ამ პერიოდში პირველად იწყება ფართო ხასიათისა და რთულპროფილიანი სამელითონეო ხელოსნობის წარმოება; ადგილობრივი, უხეშად დამუშავებული თიხის ნაწარმის გვერდით ჩნდება წითლად შეღებილი და გაპრიალებული იმპორტული ჭურჭელი; შორმანძილიანი სავაჭრო ურთიერთობის შედეგად შემოდის კალიანი ბრინჯაოს ნაწარმი; რელიგიური რიტუალებისათვის მზადდება ანთროპომორფული და ზოომორფული თიხის ქანდაკებები; ჩნდება ბორბლიანი ტრანსპორტი; საზოგადოების დიფერენციაციის საფუძველზე მზადდება განსაკუთრებული სამკაული ლითონის დიადემა და სხვა.



ახალციხის მუზეუმში დაცულ სამცხე-ჯავახეთის ნუმიზმატიკურ კოლექციებს საქართველოს ისტორიაში გამორჩეული ადგილი უკავია, რისი მიზეზიც ამ რეგიონში დოკუმენტურად დადასტურებული ორი სამონეტო კარის _ ახალციხის და არტანუჯის ზარაფხანის არსებობაა. ამ რეგიონში სამონეტო მიმოქცევა ძვ. წ. V საუკუნის II ნახევრიდან - „კოლხური თეთრით“ დაწყებული XIX საუკუნის ჩათვლით, თითქმის ქრონოლოგიური უწყვეტობით მიმდინარეობს.

ყოველივე ამის გათვალისწინებით, შეივსო და განახლდა ნუმიზმატიკური ექსპოზიცია, რომლის მთავარი კონცეფციაა სამონეტო განძების საშუალებით წარმოჩინდეს, რომ ეს რეგიონი ყოველთვის იყო აქტიურად ჩართული მთელი ქვეყნის პოლიტიკურ-ეკონომიკურ პროცესებში და, ამავდროულად, მუდმივი კავშირი გააჩნდა გარე სამყაროსთან.

ექსპოზიციაზე ასევე წარმოდგენილია არტანუჯის ზარაფხანაში მოჭრილი მონეტა, რომელიც მუზეუმს დროებით მფლობელობაში გადასცა საუდის არაბეთის სამეფოში საქართველოს საგანგებო და სრულუფლებიანმა ელჩმა გიორგი ჯანჯღავამ.

[sknews.ge]