'მთავრობავ, გამოფხიზლდი', - ჟურნალისტების აქცია ახალციხეში

თბილისისა და საქართველოს სხვა დიდი ქალაქების პარალელურად, ჟურნალისტებმა აქცია ახალციხეშიც 13.00 საათზე ადმინისტრაციის შენობასთან გამართეს, შემდეგ კი ტრანსფარანტებით - „ერთი ჯიპით ნაკლები მთავრობავ!“ „მირზას ვჭირდებით“, „მთავრობავ გამოფხიზლდი“, „ლეიკემიითა და სიმსივნით დაავადებულ ბავშვებს ჩვენი დახმარება სჭირდებათ“, „მთავრობავ ბავშვების სიცოცხლის გადარჩენა შენი პასუხისმგებლობაა“ ქალაქში მსვლელობა მოაწყვეს.

გაზეთის „სამხრეთის კარიბჭისა“ და ადგილობრივი ტელევიზიის მე-9 არხის ჟურნალისტებს სამხარეო ადმინისტრაციის პრესამსახურის წარმომადგენელი ია გოგატიშვილი შეუერთდა.

ლეიკემიით დაავადებული 12 წლის მირზა ცეცხლაძის მდგომარეობა უკიდურესად მძიმეა. მისი გადარჩენა მხოლოდ ძვლის ტვინის ტრანსპლანტაციის შემთხვევაშია შესაძლებელი. თუკი 10 დღის განმავლობაში ბავშვის კლინიკაში ( ვერონა, იტალია) გაგზავნა ვერ მოხერხდება, ის დაიღუპება. კლინიკა მოწვევას მხოლოდ მაშინ გამოგზავნის, როცა სამკურნალოდ საჭირო თანხა კლინიკის ანგარიშზე ჩაირიცხება. თანხა 100 000 ევროს შეადგენს.

„დიმიტრი ცინცაძის სახელობის ფონდმა“ და მირზა ცეცხლაძის ოჯახმა კეთილი ადამიანების დახმარებით ამ თანხის ნახევრის მობილიზება შეძლეს. დრო ამოიწურა, ბავშვის სიცოცხლის გადარჩენა კი მხოლოდ ამ თანხაზეა დამოკიდებული.

აქციის ორგანიზატორია „დიმიტრი ცინცაძის სახელობის ფონდი“.

ამავე თემაზე იხილეთ ვიდეო და ფოტორეპორტაჟი.

[www.sknews.ge]