მირზა ცეცხლაძის მკურნალობას ჯანდაცვის სამინისტრო დააფინანსებს

ლეიკემიითა და სოლიდური სიმსივნეებით დაავადებული ბავშვების გადასარჩენად გაერთიანებული ჟურნალისტებმა საქართველოს სხვადასხვა ქალაქებში აქცია გამართეს. აქციის დაწყებიდან დაახლოებით 15 წუთის შემდეგ, თბილისში, რუსთაველის გამზირზე შეკრებილ ჟურნალისტებთან ჯანდაცვის მინისტრი მივიდა და სამინისტროს გადაწყვეტილება გააცნო.

„მირზა ცეცხლაძის მკურნალობას ესაჭიროებოდა 102 ათასი ამერიკული დოლარი, 2013 წლის დასაწყისში ჯანდაცვის სამინისტრომ ის 20 ათასი დოლარით დააფინანსა. 2013 წლის 3 აპრილს მათ ისევ მოითხოვეს 95 ათსი ევრო, ამჯერად უკვე იტალიის ქალაქ ვერონაში სამკურნალოდ და რეფერალური პროგრამის ფარგლებში მისი მკურნალობა დაფინანსდა 10 ათასი ევროთი, მთლიანობაში მირზასთვის გამოყოფილი იყო 10 ათასი ევრო და 11 440 დოლარი. დღეს უკვე სამინისტრომ ვერონაში მისი მკურნალობის სრული კურსის დაფინანსების გადაწყვეტილება მიიღო“, - განაცხადა სამინისტროს პრესსამსახურის ხელმძღვანელმა თამარ ბოდოკიამ.

მირზა ცეცხლაძეს რამდენიმე თვის წინ აპლაზური ანემია დაუდგინდა, რისთვისაც აუცილებელია ძვლის ტვინის გადანერგვა.

შეგახსნებთ, რომ დღევცანდელი აქცია „დიმიტრი ცინცაძის ფონდის“ ორგანიზებით გაიმართა. ჟუნრალისტებმა აღნიშნეს, რომ ლეიკემიითა და სოლიდური სიმსივნეებით დაავადებული ბავშვებს ისინი მომავალშიც დაეხმარებიან.

„ცხოვრებაში პირველად (და იმედია არა უკანასკნელად) მადლობა, მთავრობავ!
ეს-ესაა ალბათ, მსოფლიოში ყველაზე მოკლე და ყველაზე შედეგიანი აქციიდან დავბრუნდი - რუსთაველზე, ჟურნალისტების აქციის მე-15 წუთზე ჯანდაცვის მინისტრი, დავით სერგეენკო მოვიდა და გვითხრა, რომ მთავრობა მირზა ცეცხლაძის ოპერაციისთის დარჩენილ თანხას დაფარავს. ბატონი მინისტრი სხვა ბავშვების დახმარებასაც დაგვპირდა. ჰოდა, კიდევ ერთხელ, მადლობა მთავრობავ - ჩვენ კი მომავალშიც დაგეხმარებით მსგავსი აქციებით. არც მოვდუნდებით და არც მოგადუნებთ:) ეს ერთობლივი შედეგია - მადლობა ჩვენს კოლეგებს ბათუმიდან, ჩოხატაურიდან, ახალციხიდან, ქუთაისიდან, ზუგდიდიდან, გურჯაანიდან... მთელი საქართველოდან. ძალა ერთობაშია!“, - წერს ჟურნალისტი დაჩი გრძელიშვილი საკუთარ ფეისბუქის გვერდზე.

შეგახსენებთ, რომ 12 წლის მირზა ცეცხლაძის დასახმარებლად აქციას ახალციხელი ჟურნალისტებიც შეუერთდნენ.

[თამარ თოთაძე, ახალციხე]