ბორჯომში ლეიკემიით დაავადებული ბავშვებისათვის სისხლი გაიღეს

ბორჯომის საგანმანათლებლო რესურსცენტრის ორგანიზებულ აქციაში აქტიური მონაწილეობა მიიღეს ბორჯომის მუნიციპალიტეტის გამგეობისა და საკრებულოს თანამშრომლებმა, დეპუტატებმა და საჯარო სკოლების პედაგოგებმა. დონორებმა სისხლი მ. იაშვილის კლინიკის ლეიკემიით დაავადებული ბავშვებისათვის გაიღეს.

აქცია პარალელურად მიმდინარეობდა დაბა ბაკურიანის საჯარო სკოლაშიც.

საგანმანათლებლო რესურსცენტრის უფროსის იზოლდა ლომიძის განცხადებით, აქცია განათლების სამინისტროსა და შპს „სისხლის ბანკს“ შორის გაფორმებული მემორანდუმის ფარგლებში გაიმართა: „ამ სასიკეთო საქმის შესახებ განათლების სამინისტრომ გვაცნობა, ჩვენ კი მუნიციპალიტეტის ყველა საჯარო სკოლის ინფორმირება მოვახდინეთ, აქციაში მონაწილეობა მიიღეს ასევე სხვადასხვა დაწესებულებების თანამშრომლებმა".

მ. იაშვილის სახელობის ცენტრალური საავადმყოფო ერთადერთია საქართველოში, სადაც ლეიკემიითა და სხვა მძიმე პათოლოგიით დაავადებული ბავშვები (0-8 წლამდე) მკურნალობენ. მათ ყოველდღიურად სჭირდებათ ახალი სისხლისაგან დამზადებული კომპონენტები დღეში 15-20 ერთეულის ოდენობით. ძალიან ხშირად იქმნება დეფიციტი, პაციენტის მშობლებს და მათ ახლობლებს სტრესულ მდგომარეობაში უწევთ დონორთა მოძიება. სწორედ, ამ გარემოების გათვალისწინებით გააფორმა თანამშრომლობის მემორანდუმი საქართველოს განათლებისა და მეცნიერების სამინისტრომ მ. იაშვილის სახელობის ცენტრალურ საავადმყოფოსთან და ამით ჩაერთო ბავშვთა ლეიკემიურ დაავადებებთან ბრძოლის პროცესში.

[sknews.ge]