‘ნუ გვესვრი’– ახალციხეში ჟურნალისტებმა აქცია გამართეს

"ჟურნალისტური ეთიკის ქარტიის" მიერ, ქვეყნის მასშტაბით ორგანიზებულ აქციას, ახალციხეში „სამხრეთის კარიბჭესა“ და „მეცხრე არხის“ ჟურნალისტები, ასევე „საერთაშორისო გამჭვირვალობა–საქართვლოს“ რეგიონული კოორდინატორი შეუერთდნენ.

„დღეს ჩვენ ვაპროტესტებთ ძალის გადამეტებას შს სამინისტროს წარმომადგენლების მხრიდან, ეს უდაოდ იყო ძალის გადამეტება. ძალიან ბევრი ჟურნალისტი დაშავდა რაც იყო დაუშვებელი ქმედება და ეს, უნდა იყოს გამოძიებული“,–გვითხრა „საერთაშორისო გამჭვირვალობა–საქართველოს“ რეგიონულმა კოორდინატორმა თამუნა უჩიძემ.

„ეს აქცია არის გუშინდელი მოვლენების გამოძახილი. ყველა ვამბობთ, არა ძალადობას! არა ოკუპაციას! და არ უნდა მოხდეს ჟურნალისტების ხელის შეშლა“,–ამბობს „მეცხრე არხის“ დირექტორი მაია იველაშვილი.

„სამხრეთის კარიბჭეს“ ჟურნალისტის მარიამ ბარძიმაძის თქმით, ამ ფორმით, სოლიდარობა გამოხატა იმ ჟურნალისტების მიმართ, ვინც აქციაზე დაშავდა: „სამართალდამცველებმა გუშინ, ხელი შეუშალეს ჩვენს კოლეგებს, რათა მათი პროფესიული მოვალეობა შეესრულებინათ. დიახ! რუსეთი ოკუპანტია და დღეს ჩვენ ამის სათქმელადაც მოვედით“.

ჟურნალისტების აქცია, ასევე, გაიმართა:თბილისში, ბათუმში, ზუგდიდში, ქუთაისში, გორში, ხარაგაულში და კახეთში.

„ჟურნალისტური ეთიკის ქარტიის“ ინფორმაციით, ამ დროისთვის იდენტიფიცირებულია მედიის 31 წარმომადგენელი, რომლებიც 20-21 ივნისს, თბილისში აქციის ძალით დაშლის დროს დაშავდნენ.





[ლუბა გიორგაძე, ახალციხე]