ახალციხეში 26 მაისის აღსანიშნავად ემზადებიან

ღონისძიების ფარგლებში ახალციხის ციხის ტერიტორიაზე მოეწყობა სპორტული ღონისძიებები, წიგნების გამოფენა-გაყიდვა, ღვინის ფესტივალი, ადგილობრივი მხატვრების, ხალხური რეწვის ოსტატებისა და შეზღუდული შესაძლებლობის მქონე პირთა ხელნაკეთი ნივთებისა და ნამუშევრების გამოფენა.

პატარებისთვის გაიმართება თოჯინების თეატრის წარმოდგენა. მოეწყობა ასფალტზე ხატვა, რომელშიც ახალციხის სამხატვრო სკოლის მოსწავლეები მიიღებენ მონაწილეობას.

პარალელურად, თამარაშვილის ქუჩაზე, თავდაცვის სამინისტროს ორგანიზებით, სამხედრო ტექნიკა გამოიფინება. მისი დათვალიერება ნებისმიერ მსურველს შეეძლება. ახალციხის ციხის ტერიტორიაზე განთავსდება მონიტორი, სადაც პირდაპირ ეთერში გადაიცემა ფიცის მიღების საზეიმო ცერემონიალი თბილისიდან.

ღონისძიების ფარგლებშივე ქალაქის სკოლების კურსდამთავრებულებს სწავლის დასრულებას მიულოცავენ და სიმბოლურ საჩუქრებს გადასცემენ რეგიონისა და მუნიციპალიტეტის პირველი პირები.

დამოუკიდებლობის დღისადმი მიძღვნილი ზეიმი გაგრძელდება კონცერტით, რომელშიც ადგილობრივი ქორეოგრაფიული და ფოლკლორული ანსამბლები და ქართული ესტრადის ვარსკვლავები მიიღებენ მონაწილეობას. მაყურებლების წინაშე წარსდგებიან მერაბ სეფაშვილი, ოთო ნემსაძე, სალომე ბაკურაძე, მარიკო ებრალიძე, აჩიკო ნიჟარაძე და ტრიო „სანო+2“.

ღონისძიება საქართველოს ჰიმნითა და საზეიმო ფეიერვერკით დასრულდება.

დამოუკიდებლობის დღის აღნიშვნა 12:00 საათზე დაიწყება და 21:00 საათზე დასრულდება.

[sknews.ge]