ახალციხის ციხეზე 80 რეწვის ოსტატის ნამუშევრებია გამოფენილი [Video]

ადგილობრივ რეწვის ოსტატებთან ერთად ფესტივალში მონაწილეობენ თურქეთიდან, ლატვიიდან, ყაზახეთიდან, ყირგიზეთიდან, ტაჯიკეთიდან და თურქმენეთიდან მოწვეული ოსტატებიც.

სტუმრები თავიანთი ქვეყნების კულტურასა და ტრადიციებს, ციხეზე გამოფენილი ნივთებით წარმოადგენენ. უზბეკებს ბამბის ნამუშევრები აქვთ გამოფენილი, ყირგიზებს აბრეშუმით და ხავერდით ნაქსოვი სამოსი, თურქებს კერამიკის ნიმუშები.

ფესტივალზე გამოტანილი ნივთების გაკეთებას ოსტატები მსურველებს ადგილზე ასწავლიან.

ფესტივალის ფარგლებში პირველად მოეწყო მე–19–მე– 20 საუკუნეების ტრადიციული სახელოსნოების გამოფენა. ახალციხის ციხეზე წარმოდგენილია ძველი სახელოსნოების ფოტომასალა, ასევე ძველი ფოტოების მიხედვით დამზადებული მაკეტები.

“ეს არის უკვე ტრადიციად ქცეული ფესტივალი,რომელიც 2015 წელს ხალიჩების გამოფენით დავიწყეთ. ფესტივალზე ასევე არის მხატვრების სახელოსნოებიც. ველოდებით 30–მდე ტურისტულ სააგენტოს, რომლებიც ჩამოსულ სტუმრებს ქართულ ხალხურ ხელოვნებას გააცნობენ,“ – გვითხრა ხალხური და გამოყენებითი ხელოვნების მუზეუმის დირექტორმა და ფესტივალის ორგანიზატორმა ირინა ყოშელიძემ.

ახალციხის მერიის კულტურის სამსახურის უფროსის ზაზა თამარაშვილის თქმით, ეს რეწვის სახელოსნოების პირველი გამოფენაა და განსაკუთრებით მნიშვნელოვანი ისაა, რომ ასეთი ღონისძების მოწყობა ახალციხეში დაიგეგმა. ფესტივალი ქალაქის და ახალციხის ციხის ცნობადობას გაზრდის, რაც ტურუსტული თვალსაზრისით ძალიან მნიშვნელოვანია.



ფესტივალს საქართველოს ხალხური და გამოყენებითი მუზეუმი, ასევე, საქართველოს ტრადიციული რეწვის ასოციაცია, ახალციხის მერიასა და ახალციხის ციხესთან თანამშრომლობით ატარებენ.

გამოფენა–გაყიდვა ახალციხის ციხის როგორც ქვედა, ისე ზედა ნაწილში მიმდინარეობს. ფესტივალიდღეს, 14 სექტემბერს დაიწყო და 16 სექტემბერს დასრულდება.



[ავთო ინასარიძე, ნანა ინასარიძე – ახალციხე]