სოფელ ანდაში სტიქიისგან დაზიანებული გზა აღდგება

როგორც მერიაში ამბობენ, რა თანხა დაიხარჯება გზის აღდგენისათვის, სამუშაოების დასრულების შემდეგ გახდება ცნობილი. თვითმმართველობაში ჯერ ვერც იმას აკონკრეტებენ, ვინ აღადგენს სტიქიისაგან დაზიანებულ გზას.

ძლიერი წვიმა და სეტყვა ახალციხის სოფელ ანდაში 22 მაისს იყო. ადგილობრივების თქმით, დაზიანდა სასოფლო–სამეურნეო ნაკვეთები და ხეხილის ბაღები, დაიტბორა ეზოები და სარდაფები.

თვითმმართველობაში განმარტავენ, სტიქიას ადგილობრივების სასოფლო– სამეურნეო ნაკვეთებისა და ხეხილისთვის მნიშვნელოვანი ზიანი არ მიუყენებია. შესაბამისად, მუნიციპალიტეტი მხოლოდ სოფლის ცენტრალურ გზას აღადგენს.

სოფელ ანდასთან ერთად, 22 მაისს სტიქია იყო ახალციხის კიდევ სამ სოფელში. ძლიერმა წვიმამ, წყალთბილის, სხვილისისა და ვალის ე.წ მეორე შახტის მცხოვრებლები დააზარალა. რაც შეეხება ქალაქ ახალციხეს, წვიმისაგან ადიდებულმა ე.წ ღრელის წყლებმა მიქელაძეების სახლი დატბორა.

[ლუბა გიორგაძე, ახალციხე]