რაბათში კალათბურთის ჩემპიონატის ფინალური თამაშები გაიმართა

დღეს, 15 მაისს, კალათბურთის ფინალურ თამაშში ერთმანეთს მუნიციპლაური ტურნირის გამარჯვებულები: ვაჟებში ახალციხისა და ბორჯომის, ხოლო გოგონებში ბორჯომისა და ნინოწმინდის გუნდები დაუპირისპირდნენ.

დაძაბული მატჩების შემდეგ, გამარჯვება გოგონებში – ნინოწმინდის, ვაჟებში კი ბორჯომის გუნდებმა მოიპოვეს.

ბორჯომელმა მოთამაშეებმა ახალციხელები ანგარიშით 10:9 დაამარცხეს.

ბორჯომის გუნდიდან გამორჩეული იყო გიორგი სტეფანიძის თამაში. როგორც ამბობს, მისი სამომავლო მიზანი NBA-ში მოხვედრაა: "უძლიერესი მეტოქე გვყავდა, დიდი ხანია ამ თამაშისთვის ვემზადებოდით. გამარჯვებით ბედნიერი ვარ, გრძნობები უსაზღვროა", – ამბობს 16 წლის სპორტსმენი.

ფინალურ მატჩამდე მისაღწევად, რთული გზის გავლა მოუხდა ახალციხის გუნდსაც. "მუნიციპალურ ტურნირში ერთ–ერთმა გუნდმა დიდი კონკურენცია გაგვიწია. დღეს კი ყველაზე ძლიერ მეტოქესთან, ბორჯომთან დავმარცხდით და გულდაწყვეტილი ვარ. თუმცა მომავალ წელს უკეთ ვითამაშებთ", – განმარტავს ახალციხელი დათო ყავრელიშვილი.

მატჩის დასრულების შემდეგ, ახალციხის გუნდის მწვრთნელმა, ბადრი ასპანიძემ მსაჯი გააკრიტიკა. მისი აზრით, ქულა რომელიც მეტოქეს ჩაეთვალა, სადავო იყო და მსაჯი დაუდევრად მოიქცა.

კალათბურთის ტურნირი, ბავშვთა და ახალგაზრდობის ეროვნული ცენტრის ორგანიზებით, პროექტის „სპორტი ბარიერების გარეშე“ ფარგლებში მოეწყო. ტურნირში ქვეყნის მასშტაბით, 4 000 მოზარდი მონაწილეობს.

ახალციხეში, რეგიონულ ჩემპიონატში გამარჯვებული გუნდები, ანაკლიის ბანაკში გაემგზავრებიან და ქვეყნის პირველობისთვის იბრძოლებენ.



[ავთო ინასარიძე, ახალციხე]