ადიგენის მერია ჩორჩნის სკოლის ეზოში გამავალ არხს მოაწესრიგებს

ადიგენის მერის მოადგილის, არსენ ბალახაშვილის თქმით, ჩორჩნის სკოლის ეზოში სარწყავი წყლის ბუნებრივი არხი გადის, რომელიც გასაწმენდია – "დაბინძურებული წყალი მოედინება და არხი გაიჭედა, შესაბამისად, ეს წყალი გადმოდის, ნაწილი საპირფარეშოში ჩადის ნაწილი კი სკოლის გზაზე მიედინება".

მისივე განმარტებით, პირველ ეტაპზე, გაჭედილ არხს ტექნიკით გაწმენდენ. იმ შემთხვევაში კი, თუ პრობლემა არ მოგვარდება და დაბინძურებული წყალი საპირფარეშოსა და გზაზე კიდევ გადავა, თვითმმართველობა წყლის მილებს დაამონტაჟებს.

"ჯერ–ჯერობით ყველანაირი დანახარჯის გარეშე, ტრაქტორით შევეცდებით პრობლემის მოგვარებას, თუ არაფერი გამოვიდა, თანხებს გამოვყოფთ ბიუჯეტიდან და სისტემას დავამონტაჟებთ", – გვიხსნის ადიგენის მერის მოადგილე არსენ ბალახაშვილი.

რაც შეეხება, სკოლაში მისასვლელ გზას, რომელიც წყლის გამო ატალახებულია, არსენ ბალახაშვილი ამბობს, რომ არხის პრობლემის მოგვარების შემდეგ, გზაზე წყალი აღარ გადავა და არც ტალახი იქნება.

შეგახსენებთ, რომ სოფელ ჩორჩანში არსებულ პრობლემებზე "სამხრეთის კარიბჭე" წერდა, მცხოვრებლები ამბობდნენ, რომ სკოლის ტუალეტის კანალიზაციას, ბუნებრივი არხით სოფლის კანალიზაციაც უერთდება, ამიტომ ტუალეტი პერიოდულად ისე ივსება, რომ შიგნით შესვლა შეუძლებელი ხდება.

ამასთან, ადგილობრივები სკოლაში მისასვლელი გზის რეაბილიტაციასაც ითხოვდნენ. მათი თქმით, ტალახის გამო, ბავშვებს სკოლაში სიარული უჭირთ – "როცა წვიმს, ბავშვს ფეხსაცმლით სკოლაში ვერ ვუშვებ, წვიმის წყალს გზაზე კანალიზაციის არხიდანაც ერევა წყალი და თუ "ვალინკები" არ ჩავაცვი ეზომდეც ვერ მივა".

[ლუბა გიორგაძე, ადიგენი]