სოფელ ჩორჩნის სკოლის ეზო და საპირფარეშო მოწესრიგდა

დღეს, 17 სექტემბერს, ჩორჩნის სკოლის მოსწავლეებს სკოლის ეზოში ახლადაშენებული საპირფარეშო დახვდათ, ასევე, მოწყობილია სკოლის ეზოდან შენობამდე მისასვლელი ბილიკი. რაც შეეხება ღობეს, სკოლა ლითონის ბადით შემოისაზღვრება. ამისთვის კი სამუშოები ამ დრომდე მიმდინარეობს.

„ღობის შემოვლება ჯერ არ დაგვისრულებია, მაგრამ მალე მოვრჩებით, ამით ბავშვებს სწავლაში ხელი არ შეეშლებათ. ამ ღობეს დროებით ვაკეთებთ, რომ უფრო უსაფრთხო იყოს, მომავალი წლიდან უფრო მყარ ლითონის ბადეს შემოვავლებთ“,– ამბობს ჩორჩნის სკოლის დირექტორი ირმა ქიმაძე.

მიმდინარე წელს, განხორციელებული ინფრასტრუქტურული სამუშაოებისათვის, სკოლის ბიუჯეტიდან 3 000 ლარზე მეტი დაიხარჯა. დირექტორი ამბობს, რომ მომავალი წლიდან სკოლაში სხვა ინფრასტრუქტურული სამუშაოებიც შესრულდება.

ჩორჩნის დაწყებითმა სკოლამ დღეს შვიდი პირველკლასელი მიიღო. სკოლაში სულ 12 მოსწავლეა.

შეგახსენებთ, რომ ჩორჩნის სკოლის საპირფარეშო პერიოდულად ფეკალიებით იტბორებოდა, მიუვალი იყო გზა ეზოს შესასვლელიდან შენობამდე და მორღვეული იყო ღობეც.





[ლუბა გიორგაძე, ახალციხე]