აწყურის ტყეში ხეები ხმება

სოფელ აწყურთან ახლოს, მდინარე მტკვრის მარჯვენა სანაპიროზე, მთის ფერდობზე გაყვითლებული ფიჭვის ხეები ადგილობრივებმა პირველად გასულ წელს შენიშნეს. მათი თქმით, წელს გამხმარი ხეების რაოდენობამ იმატა.

„შეიძლება რაიმე დაავადება გაჩნდა და ხეები იმიტომ ხმება. მაგ ტყეში ხის მოსაჭრელად არავინ შედის“, – ამბობს აწყურში მცხოვრები იზოლდა გაჩეჩილაძე.

მის მოსაზრებას იზიარებს მეზობლად მცხოვრები ეთერ გოგოლაძე: „ალბათ ლაფნიჭამია ყავს ხეებს, სხვა არ ვიცი მიზეზი რა შეიძლება იყოს“.

ტყეში წელს გამხმარი ხეების რაოდენობამ რომ იმატა, ამაზე აწყურში მერის წარმომადგენელი ალექსი ლაბაძეც საუბრობს: „წვერი თუ გაუხმა წიწვოვან ხეს, ის მერე მთლიანადაც ხმება. ეგ ტერიტორია სატყეოს ეკუთვნის, ალბათ მიზეზს იქ უკეთ გეტყვიან“.

ეროვნულმა სატყეო სააგენტომ აწყურის ტყეში ხეების ხმობის შესახებ „სამხრეთის კარიბჭედან“ შეიტყო: „რამდენიმე დღეში სპეციალისტების ჯგუფს გამოვგზავნით და შეისწავლიან ვითარებას. მანამდე ხეების ხმობის მიზეზებზე საუბარი გაგვიჭირდება“.

[თინათინ ზაზაძე, ახალციხე]