სოფელ წირაში მკვდარი ძროხა იპოვეს

სურსათის ეროვნული სააგენტოს სამცხე-ჯავახეთის რეგიონულ სამმართველოში განმარტავენ, რომ პირუტყვი დაახლოებით ორი კვირის წინ დაეცა. ამიტომ, საქონლის სიკვდილის მიზეზის დადგენა გაჭირდება.

აღნიშნული სამსახურის წარმომადგენლები ვითარებას ადგილზე გაეცვნენ.

სურსათის ეროვნული სააგენტოს სამცხე-ჯავახეთის რეგიონული სამმართველოს უფროსის ლია ბექაურის განმარტებით, მიუხედავად იმისა, რომ საქონელი ორი კვირის წინაა დაცემული,შესაბამისი ანალიზი მაინც ჩაუტარდება.

-”პირუტყვი იმდენად გაფუჭებული და გახრწნილი იყო, რომ ვერ დაადგენ სიკვდილის მიზეზს. ჩვენ ავიღეთ ნიმუშად ტყავის ფრაგმენტი და გადავაგზავნეთ ლაბორატორიაში. პასუხი რამდენიმე დღეში გახდება ცნობილი”, - განმარტავს სურსათის ეროვნული სააგენტოს სამცხე-ჯავახეთის რეგიონული სამმართველოს უფროსი ლია ბექაური.

ბექაურის განმარტებით, შეუძლებელია პირუტყვის მეპატრონის ვინაობის გარკვევაც. როგორც იგი ამბობს, სოფელში გამოკითხული მოსახლეობიდან პირუტყვის მეპატრონე არცერთი აღმოჩნდა: ”ძნელია დაადგინო ვისი საკუთრებაა. საქონელს თავი მოჭრილი აქვს, შესაბამისად არ აქვს საყურე ნიშანი”.

დაცემულ პირუტყვს შესაბამისი სამსახურის წარმომადგენლები ადგილზე დამარხავენ. ტერიტორიას კი სპეციალური ხსნარით დაამუშავებენ.

-”იმდენად გახრწნილია, რომ მისი გადაადგილება შეუძლებელია. ამისთვის ადგილობრივი თვითმმართველობა ტრაქტორს გააგზავნის, რომ დასამარხად მიწა გათხარონ”, - განმარტავს ახალციხის მუნიციპალიტეტის გამგებლის დროებით მოვალეობის შემსრულებელი ბესიკ ბლიაძე.

[თინათინ ზაზაძე, ახალციხე]