სამცხე–ჯავახეთში წვრილფეხა პირუტყვის ვაქცინაცია მიმდინარეობს

სურსათის უვნებლობის სამსახურის სამცხე–ჯავახეთის რეგიონული სამსახურში განმარტავენ, რომ წვრილფეხა პირუტყვის აცრა რამდენიმე დღეში რეგიონის სხვა მუნიციპალიტეტებშიც დაიწყება. ვაქცინაციას ხელშეკრულებით აყვანილი თანამშრომლები ატარებენ.

„ახალქალქის მუნიციპალიტეტში ვაქცინაცია 17 თებერვლიდან დავიწყეთ. აქ რვა თანამშრომელი მუშაობს ყოველდღიურად“, – ამბობს სამსახურის უფროსი ლია ბექაური.

მისი თქმით, წვრილფეხა პირუტყვის ვაქცინაცია ჭირზე, სავარაუდოდ, სამ კვირაში დასრულდება. ამ ეტაპზე დაავადება სამცხე–ჯავახეთში არ გამოვლენილა.

სააგენტოს ინფორმაციით, პირუტყვის დაავადებისა და დაცემის შესახებ შეტყობინება სურსათის ეროვნულმა სააგენტომ, 2016 წლის იანვარში, თბილისის შემოგარენში არსებული ფერმიდან მიიღო. რის შემდეგაც სააგენტოს ვეტერინარებმა ნიმუშები აიღეს. პირველადი დიაგნოზით სპეციალისტებმა ეჭვი ცხვრის კატარალურ ცხელებაზე (ბლუტანგი) მიიტანეს. ზუსტი დიაგნოსტირების მიზნით, ნიმუშები დიდ ბრიტანეთში არსებულ საერთაშორისო რეფერალურ ლაბორატორიაში გადაიგზავნა. გამოკვლევის შედეგებით ცხვრის კატარალური ცხელება არ დადასტურდა. დამატებითი კვლევებით წვრილფეხა პირუტყვის დაავადება - ჭირი დადგინდა. აღნიშნული დაავადება მეზობელ ქვეყნებში - თურქეთსა და ირანშიც ფიქსირდება.

დაავადების გამოვლენისთანავე, სურსათის ეროვნულმა სააგენტომ 1 მლნ დოზა მაღალი ხარისხის ვაქცინა შეისყიდა. ჯამში 800 ათასი სული წვრილფეხა პირუტყვის აცრაა დაგეგმილი.

წვრილფეხა პირუტყვის ჭირი ვირუსული დაავდებაა, რომელსაც ახასიათებს სწრაფი გავრცელება არავაქცინირებულ ცხოველებში (ცხვარი, თხა). დაავადებული პირუტყვის ხორცის საკვებად გამოყენება არ შეიძლება.

[თინათინ ზაზაძე, ახალციხე]