რა გახდა დაავადებული პირუტყვის აცრის გაჭიანურების მიზეზი

"სამხრეთის კარიბჭის" მიერ გამოქვეყნებული სტატიის შემდეგ, რომელიც დაავადებული პირუტყვის აცრის პროცესის გაჭიანურებას ეხებოდა, ახალციხის მუნიციპალიტეტის გამგეობის თანამშრომლები სოფლის მეურნეობის სამინისტროს სურსათის ეროვნული სააგენტოს წარმომადგენლებს შეხვდნენ.

აღნიშნული სამინისტროს წარმომადგენლებმა მუნიციპალიტეტის გამგებლისგან პრობლემის გადასაჭრელად გარკვეული დრო ითხოვეს.

”როგორც გვითხრეს პროგრამაზე მუშაობას 4-5 დღეში დაიწყებენ და სავარაუდოდ 25 დღეში დაასრულებენ. ამ ეტაპზე თურქულის თავიდან ასაცილებლად შესაბამის ზომებს იღებენ”,-ამბობს მალხაზ ჟუჟუნაძე.

ჟუჟუნაძის თქმით, დარჩენილი 600 სული პირუტყვის აცრის პროცესის გაჭიანურების მიზეზიც სწორედ ეს გახდა:”როგორც გვითხრეს, რამდენიმე ვეტერინარი ჰყოლიათ, რომლებიც ამ ეტაპზე თურქულის პრევენციაზე მუშაობენ. ვეტერინარების არასაკმარისი რაოდენობის გამო ორ პრობლემას ერთდრაოულად ვერ უმკლავდებიან”.

შეგახსენებთ, რომ გუშინ ახალციხის მუნიციპალიტეტის გამგეობის თათბირზე სურსათის ეროვნული სააგენტოს სამცხე-ჯავახეთის რეგიონული სამმართველოს უფროსი ლია ბექაური დაიბარეს.

ახალციხის მუნიციპალიტეტის გამგებელმა ბესიკ ბლიაძემ ლია ბექაურს პროცესის გაჭიანურების გამო უსაყვედურა და დაინტერესდა, თუ რატომ არ იწყება დარჩენილი 600 პირუტყვის აცრა.

ახალციხის მუნიციპალიტეტის გამგებელმა ბექაურისგან სრული პასუხი ვერ მიიღო. ამიტომ, ბლიაძე სურსათის ეროვნული სააგენტოს სამცხე-ჯავახეთის რეგიონული სამმართველოს ხელმძღვანელობასთან შეხვედრას ითხოვდა.

[მანანა სარაშვილი, ახალციხე]