სოფელ ანში ბრუცელოზის შემთხვევებმა იმატა

ახალციხის მუნიციპალიტეტის სოფელ ანში დაახლოებით 600 სული საქონელი ჰყავთ. აღნიშნულ დაავადებაზე გამოკვლევის ჩატარება ახალციხის მუნიციპალიტეტის გამგეობაში შესული განცხადების საფუძველზე დაიწყო. სურსათის ეროვნული სააგენტოს სამცხე-ჯავახეთის რეგიონულ სამმართველოში ამბობენ, რომ ანალიზი მხოლოდ ას სულ საქონელს გაუკეთდა. აქედან ოცდაორს ბრუცელოზი აღმოაჩნდა.

ახალციხის მუნიციპალიტეტის გამგებლის მოვალეობის შემსრულებლის ბესიკ ბლიაძის თქმით, ასი პირუტყვისთვის ანალიზის გასაკეთებლად თანხა ადგილობრივი ბიუჯეტიდან გამოიყო.

ამ ეტაპზე სოფელ ანში დაავადებაზე გამოკვლევა კიდევ 500 სულ საქონელს სჭირდება. სურსათის ეროვნული სააგენტოს სამცხე-ჯავახეთის რეგიონული სამმართველოს უფროსის ლია ბექაურის თქმით, 21 დღის შემდეგ ანალიზს კიდევ ას აუღებენ: ”არსებობს საშიშროება, რომ გაცილებით მეტი პირუტყვი იყოს დაავადებული”.

[ნინო ზედგინიძე, ახალციხე]