ადიგენში დამეწყრილი გზის ნაცვლად ალტერნატიული გზის პროექტს ამზადებენ

ადიგენის მუნიციპალიტეტის მერია, საავტომობილო გზების დეპარტამენტიდან, სპეციალურ ჯგუფს, რომელიც საპროექტო–სახარჯთაღრიცხვო დოკუმენტებს მოამზადებდა, თითქმის ერთი თვე ელოდა.

„ინფორმაცია არ მაქვს სამუშაო ჯგუფი ადიგენში რატომ არ წავიდა. დეპარტამენტის თავმჯდომარის ერთ–ერთი მოადგილე ხელმძღვანელობდა ამ საკითხს. ის ახლა საქართველოში არ იმყოფება“, – გვითხრეს საავტომობილო გზების დეპარტამენტის საზოგადოებასთან ურთიერთობის სამსახურში.

ადიგენის მუნიციპალიტეტის მერიის ინფრასტრუქტურის სამსახურის უფროსის გოდერძი სხრიტლაძის განმარტებით, ახალი გზის გასაყვანად საპროექტო–სახარჯთაღრიცხვო დოკუმენტების მოსამზადებლად პროექტზე ტენდერი მომავალ კვირას გამოცხადდება: „ვამზადებ საპროექტო წინადადებას. კოორდინატები უკვე ავიღე“.

შეგახსენებთ, რომ ადიგენში, დერცელის და კიკიბოს გზაზე მეწყერი 26 მარტს ჩამოწვა. მეწყერი გზის კიდევ ოთხ მონაკვეთზეა გააქტიურებული. მიუხედავად საშიშროებისა ორი სოფლის მოსახლეობა, ამ გზით მაინც სარგებლობს, რადგან ალტერნატიული გზა არ აქვთ.

სპეციალისტების გადაწყვეტილებით, გზის ეს მონაკვეთი აღდგენას არ ექვემდებარება და საჭიროა ახალი, გზის გაყვანა. სწორედ ამ გზის დასაპროექტებლად ელოდებონენ სპეციალისტებს საგზაო დეპარტამენტიდან.

[თინათინ ზაზაძე, ადიგენი]