ადიგენში, დამეწყრილ გზაზე, ადგილობრივები მსუბუქი მანქანებით მოძრაობენ

ადიგენის მუნიციპალიტეტის მერიამ, მას შემდეგ რაც დერცელი–კიკიბოს გზაზე მეწყერული პროცესები განვითარდა, გზის ჩავარდნილ მონაკვეთზე ამკრძალავი ლენტი გაავლო და მოსახლეობას საცალფეხო ბილიკით სარგებლობა ურჩია. მას შემდეგ დაახლოებით სამი კვირა გავიდა, თუმცა, ახალი გზის გასაყვანად სამუშაოები არ დაწყებულა.

თვითმმართველობაში საგზაო დეპარტამენტიდან საპროექტო ჯგუფს ელოდებიან. დერცელში მცხოვრებლები კი აცხადებენ, რომ ახალი გზის გაყვანამდე, იძულებულები არიან სახიფათო გზით იარონ: „გავასწორეთ ჩავარდნილი ადგილი და დავდივართ. საშიშია, მაგრამ სხვა გზა არ გვაქვს“.

თვითმმართველობაში განმარტავენ, რომ ამ ეტაპზე მეწყერული პროცესები შეჩერებულია, თუმცა, მოძრაობა უსაფრთხო მაინც არაა.

„დღეს აქ მიწა აღარ ცოცავს და პატარა მანქანები დადიან. მოსახლეობამ სოფლემდე პროდუქტი რომ მიიტანოს, ამის შესაძლებლობა არის. სამ დღეში რვა სანტიმეტრით იყო დაწეული. ბოლო დღეებში კი საერთოდ არ დაწეულა“, – ამბობს ადიგენის მუნიციპალიტეტის მერიის ინფრასტრუქტურის სამსახურის უფროსი გოდერძი სხირტლაძე.

როდის დაიწყება ალტერნატიული გზის გასაკეთებლად საპროექტო სამუშაოები ჯერ კიდევ უცნობია. თვითმმართველობაში აცხადებენ, რომ მათი ინფორმაციით საავტომობილო გზების დეპარტამენტში ხელმძღვანელობა შეიცვალა და საპროექტო ჯგუფის ჩამოსვლა დროში ამიტომ გაჭიანურდა. როდის შეძლებს საპროექტო ჯგუფი ადიგენში გზის პროექტზე მუშაობის დაწყებას, ამ შეკითხვაზე პასუხს "სამხრეთის კარიბჭე" საავტომობილო გზების დეპარტამენტიდან ელოდება.

შეგახსენებთ, რომ ადიგენში, დერცელი კიკიბოს გზაზე მეწყერული პროცესები 26 მარტს დაიწყო.

[თინათინ ზაზაძე, ადიგენი]