ადიგენში დამეწყრილი გზის ნაცვლად ახალს გაიყვანენ

დამეწყრილ ტერიტორიაზე, გეოლოგიური კვლევის პარალელურად ალტერნატიული გზის პროექტსაც ადგენენ. ამისთვის საავტომობილო გზების დეპარტამენტის წარმომადგენლებმა სოფელ დერცელის მიმდებარე ტერიტორია უკვე შეისწავლეს.

„ეს გზა მუნიციპალიტეტს ეკუთვნის, მაგრამ გამოუვალ მდგომარეობაში ვართ, სოფლებს უჭირთ ცენტრთან მიმოსვლა, ამიტომ გუბერნატორმა საავტომობილო გზების დეპარტამენს სთხოვა ახალი გზის დაპროექტება“, – ამბობს ადიგენის მერის მოადგილე არსენ ბალახაშვილი.

მისი თქმით, ახალი გზა, სავარაუდოდ, დამეწყრილი გზის მარჯვენა მხარეს გაივლის: „ზუსტი მდებარეობა დაპროექტების შემდეგ გვეცოდინება, ჯერ გადაჭრით ვერაფერს ვიტყვით. ამ პროცესში გეოლოგებიც ჩერთვებიან“.

ადიგენის მერიაში აცხადებენ, რომ ამ დროისთვის დათვლილი არ არის, თუ რა დაჯდება ახალი გზის მშენებლობა: „არც ისაა გადაწყვეტილი თუ საიდან მოხდება თანხის გამოყოფა პროექტის განსახორციელებლად“.

ადიგენში სოფელ დერცელიდან სამ კილომეტრში მეწყერული პროცესების განვითარება 26 მარტიდან დაიწყო. გზაზე გაჩენილი ნაპრალები ადგილობრივებმა პირველად ამ დღეს შენიშნეს. 29 მარტის დილათ კი, გზა ჩავარდა და ტრანსპორტით გადაადგილება შეუძლებელი გახდა. უკვე მეხუთე დღეა, დერცელისა და კიკობოს მცხოვრებლები მუნიციპალიტეტის ცენტრთან დასაკავშირებლად დამეწყრილ მონაკვეთზე ფეხით გადადიან.

[ლუბა გიორგაძე, ადიგენი]