ხუთი თვის შემდეგ დერცელი–კიკიბოს ალტერნატიული გზის დაპროექტება დაიწყო

დერცელისა და კიკიბოს მოსახლეობას ადიგენთან დასაკავშირებლად ისევ იმ დამეწყრილი გზის გავლა უხდება, რომელიც გეოლოგების დასკვნით საფრთხის შემცველია. აქ ალტერნატიული გზის პროექტი ჯერ საქართველოს საგზაო დეპარტამენტს უნდა შეედგინა, მოგვიანებით კი გაირკვა, რომ პროექტზე ტენდერს ადიგენის მერია გამოაცხადებდა. თუმცა, ტენდერი ორჯერ ჩავარდა, მესამედ კი შპს „ჯეოროუდმა“ 9 000 ლარად გაიმარჯვა.

„ჩამოსულები იყვნენ უკვე, გზა ნახეს და შეისწავლეს. პროექტის გადმოსაგზავნად 10 აგვისტომდე აქვთ ვადა და მერე ჩვენც გავივლით, ვნახავთ რა თანხებთან იქნება ახალი გზის მშენებლობა დაკავშირებული და დაფინანსებაზე ვიფიქრებთ“, – ამბობს ადიგენის მერიის ინფრასტრუქტურის სამსახურის უფროსი გოდერძი სხირტლაძე.

მისი თქმით, ახალი, შემოვლითი გზა, დაახლოებით, 350 მეტრ სიგრძეზე მოეწყობა: „ტყის გავლით მოეწყობა და მთლიანად აცდება დამეწყრილ მონაკვეთს. აქ მეწყერის არანაირი საფრთხე აღარ იქნება. მოეწყობა ხიდები, ასევე ჩატარდება სხვა საინჟინრო სამუშაოები“.

დერცელის და კიკიბოს გზაზე მეწყერი 26 მარტს ჩამოწვა. მეწყერი გზის კიდევ ოთხ მონაკვეთზეა გააქტიურებული. სპეციალისტების გადაწყვეტილებით, გზის ეს მონაკვეთი აღდგენას არ ექვემდებარება და საჭიროა ახალი, გზის გაყვანა.

[ლუბა გიორგაძე, ადიგენი]