ადიგენში დამეწყრილი გზის ნაცვლად ალტერნატიული გზის ტენდერი მეორედ ჩაიშალა

ადიგენის მუნიციპალიტეტის მერიაში აცხადებენ, რომ ტენდერს მესამედ გამოაცხადებენ, თუმცა ამჯერად პროექტი რეგიონული განვითარებისა და ინფრასტრუქტურის სამინისტროსთან უნდა შეთანხმდეს.

"შეიცვალა მოთხოვნები. ამის შემდეგ ყველა ტენდერი ჯერ სამინისტროში უნდა გადაიგზავნოს და შემდეგ გამოქვეყნდეს შესყიდვების საიტზე. საპროექტო–სახარჯთაღრიცხვო დოკუმენტები პირველ ივნისს გადავაგზავნეთ", – ამბობს ადიგენის მუნიციპალიტეტის მერიის ინფრასტრუქტურის სამსახურის უფროსი გოდერძი სხირტლაძე და ამატებს, რომ ტენდერის ორჯერ ჩაშლის მიზეზი შესაძლოა მოუცლელობა იყოს – „თანხა ნორმალურია, ალბათ საპროექტო ორგანიზაციებს ჯერ არ სცალიათ".

შეგახსენებთ, რომ ადიგენში სოფელ დერცელთან მისასვლელი გზის მონაკვეთი 26 მარტს დაიმეწყრა. ამ ეტაპზე მეწყერული პროცესები ოთხ ადგილზეა გააქტიურებული, მიუხედავად ამისა ადგილობრივები სახიფათო გზით მაინც სარგებლობენ. ეს ერთადერთი გზაა, რომელითაც დერცელი და კიკიბო გარესამყაროს უკავშირდება.

[თინათინ ზაზაძე, ადიგენი]