ვის მოუხდა თავის მართლება გამგეობის ტრადიციულ თათბირზე

ახალციხის მუნიციპალიტეტის სოფელ ანში ბრუცელოზით დაავადებული პირუტყვის ნაწილი უკვე მთაში წაიყვანეს. ამის შესახებ გამგეობაში ტრადიციულ თათბირზე სოფელი ელიაწმინდის რწმუნებულმა სოსო კაპანაძემ განაცხადა.

- ”ერთ თვეზე მეტია დარჩენილი საქონლის აცრას ვითხოვთ. მოსახლეობამ პირუტყვი უკვე მთაში გარეკა. საქონლის ნაწილი, რომელიც უკვე მთაშია შეუმოწმებელი დარჩება, ან მოსახლეობამ საკუთარი ხარჯით უნდა აცრას”,-ამბობს კაპანაძე.

ოთხ თვეზე მეტია რაც სოფელ ანში საქონელი ბრუცელოზით დაავადდა. 100 სული საქონელი მაშინავე შემოწმდა. 600-მდე პირუტყვის მდგომარეობა კი ამ დრომდე გაურკვეველია.

დარჩენილი პირუტყვის შესამოწმებლად გარკევული თანხა იყო საჭირო, რისთვისაც არასამთავრობო ორგანიზაცია ”მერსი ქორფსსა” და ვეტერინარულ ლაბორატორიას შორის ხელშეკრულება გაფორმდა, რის თანახმადაც აღნიშნული თანხა ”მერსი ქორფსმა” უნდა გამოყოს.

”მერსი ქორფში” აცხადებენ, რომ მათი მხრიდან დოკუმენტაციის მოწესრიგებასთან დაკავშირებით ყველაფერი მოგვარებულია.

”ველოდებით როდის გადმოგვიგზავნის ლაბორატორია მონაცემებს იმის შესახებ თუ რამდენ პირუტყვს ჩაუტარდა გამოკვლევა, რომ თანხა ჩავურიცხოთ. ჩვენი მხრიდან ყველა საკითხი მოგვარებულია”, - ამბობს ”მერსი ქორფსის” წარმომადგენელი ნინო ლომიძე.

იმის გასარკვევად თუ რატომ ჭიანურდება დარჩენილი პირუტყვის შემოწმების პროცესი, სურსათის ეროვნული სააგენტოს სამცხე-ჯავახეთის რეგიონული სამმართველოს უფროსი ლია ბექაური დაიბარა.

ახალციხის მუნიციპალიტეტის გამგებელმა ბესიკ ბლიაძემ ბექაურს პროცესის გაჭიანურების გამო უსაყვედურა და დაინტერესდა თუ რატომ არ იწყება დარჩენილი 600-მდე პირუტყვის აცრა.

როგორც ბექაურმა განმარტა ის სამსახურის ხელმძღვანელობას ელოდება: ”მათი ჩამოსვლის შემდეგაც ”მერსი ქორფსსა” და სურსათის უვნებლობის, ვეტერინარიისა და მცენარეთა დაცვის სამსახურს შორის მემორანდუმი უნდა გაფორმდეს. თანხაც ამის შემდეგ ჩაირიცხება”.

ბექაურმა თავის მართლება, იმის შესახებ თუ რატომ არ მოხდა ამ ხნის განმავლობაში პირუტყვის აცრა და გამოკვლევა, ასე სცადა: ”იმისთვის, რომ დარჩენილი საქონელი ავცრათ ტენდერის გამოცხადებასაც ვაპირებთ”.

ტენდერის გამოცხადების საჭიროებას ვერ ხედავს ახალცხის მუნიციპალიტეტის გამგებლის მოადგილე მალხაზ ჟუჟუნაძე: ”რა საჭიროა ტენდერის გამოცხადება, მაშინ როცა ”მერსი ქორფსი” მზად არის აღნიშნულ სამსახურს იმ რაოდენობის თანხა ჩაურიცხოს რაც საჭირო იქნება?!ამ საქმეში ჩაუხედავი ადამიანიც მიხვდება, რომ საეჭვოდ იქცევიან”.

ახალციხის მუნიციპალიტეტის გამგებელი სურსათის უვნებლობის, ვეტერინარიისა და მცენარეთა დაცვის სამსახურის ხელმძღვანელობასთან დაუყოვნებლივ შეხვედრას ითხოვს.

- ”ბექაური გაურკვევლად გველაპარეკება. როგორც ჩანს არ უნდა რომ თავის ხელმძღვანელობას შეგვახვედროს, თითქოს ზეწოლის ქვეშაა”, - ამბობს ჟუჟუნაძე.

ჟუჟუნაძის თქმით თუ სურსათის უვნებლობის, ვეტერინარიისა და მცენარეთა დაცვის სამსახურის ხელმძღვანელობასთანაც ვერ მოხდა შეთანხმება, მაშინ ადგილობრივი გამგეობა სოფლის მეურნეობის სამინისტროს დაუკავშირდება.

იმის შესახებ, თუ რატომ ვერ მოხერხდა ამ ხნის განმავლობაში 600 პირუტყვის აცრა, ”სამხრეთის კარიბჭე” გუშინ დაინტერესდა, როგორც სატელეფონო საუბარში სურსათის უვნებლობის, ვეტერინარიისა და მცენარეთა დაცვის სამსახურის პრესსამსახურის უფროსმა ვერიკო გულუამ განაცხადა, ამ დორისთვის ანალიზების ჩასატარებლად ფორმალური მხარეები წესრიგდება. სურსათის უვნებლობის სამსახური ხელშეკრულებას აფორმებს არასამთავრობო ორგანიზაცია ”მერსი ქორფსთან”, რომელიც დაავადებული პირუტყვის ანალიზისათვის ფინანსურ ხარჯებს დაფარავს.

- ”მას შემდეგ რაც ჩვენსა და ”მერსი ქორფს” შორის ხელშეკრულება გაფორმდება, ეს არასამთავრობო ორგანიზაცია იკისრებს ვალდებულბას გადაუხადოს ანალიზისათვის საჭირო თანხის რაოდენობა ვეტერინარულ ლაბორატორიას”, - ამბობს გულუა.

მისი თქმით, დოკუმენტაციის მოწესრიგებას რამდენიმე დღე დასჭირდება და ამის შემდეგ ანში საქონლის გამოკვლევა დაიწყება.

როდის დაიწყება დაავადებული პირუტყვის აცრა ”სამხრეთის კარიბჭე” უახლოეს დღებში შეგატყობინებთ. კვლავ დროში გაჭიანურების შემთხვევაში კი, როგორც დღეს თათბირზე გამგეობის თანამშრომლებმა განაცხადეს, ”შესაძლოა ვინმეს სამსახურეობრივი პასუხისმგებლობის საკითხი დადგეს”.

[მანანა სარაშვილი, თამუნა უჩიძე, ახალციხე]