გიორგი გოგიჩაიშვილი:‘საკრებულოში სადავო ფრაქციების შექმნაზე თანახმა ვარ’

ბორჯომის საკრებულოს თავმჯდომარის გიორგი გოგიჩაიშვილის თქმით, აპარატის უფროსი ირმა გელაშვილი, სასამართლოში მის ინტერესებს წარმოადგენს და შესაბამისად მას სრულ ნდობას უცხადებს: „თანახმა ვარ მორიგებაზე, რომელიც მათ სასამართლოში წარადგინეს, რომ საკრებულოში ორი ფრაქცია შეიქმნას“.

შეკითხვაზე, მაშინ რატომ განაცხადა მან გუშინ, 17 აპრილს, სასამართლო პროცესის დასრულების შემდეგ „სამხრეთის კარიბჭესთან“, რომ მოსამართლისთვის წარდგენილ მორიგებაზე ის თანახმა არ იყო და ფრაქციების რეგისტრირებას მხარს მხოლოდ მას შემდეგ დაუჭერდა, რაც სასამართლო ამის შესახებ გადაწყვეტილებას მიიღებდა, გვიპასუხა: „შეიძლება შემეშალა რაღაცა, ან შეკითხვა ვერ გავიგე სწორად“.

შეგახსენებთ, რომ სასამართლოში ის დეპუტატები დავობენ, რომლებსაც საკრებულოში ორი ფრაქციის „ქართული ოცნება – კონსერვატორები“ და „ქართული ოცნება – მრეწველების“ შექმნაზე უარი ეთქვათ. მათ შორის არის ისეთი სამი დეპუტატი, ანდრო გედიაშვილი, ივანე შალუტაშვილი და ოთარ არბოლიშვილი, რომლებმაც ფრაქციების შექმნის მიზნით, „ოცნების“ პარტია დატოვეს. იმისთვის, რომ საკრებულოში მეტი ფრაქცია შექმნილიყო ანდრო გედიაშვილი „კონსერვატორებში“ გადავიდა, ხოლო ივანე შალუტაშვილი და ოთარ არბოლიშვილი „მრეწველებში“.

თუმცა, მათ სწორედ ამ მიზეზით საკრებულოს უმრავლესობამ, (რომელიც ოპოზიციური პარტიების წარმომადგენლებისგან არის დაკომპლექტებული) ფრაქციების დარეგისტრირებაზე უარი უთხრა.

თუმცა, გუშინდელ სხდომაზე სასამართლოში მხარეებმა მოსამართლეს საკუთარი ინიციატივით მორიგების შესახებ დოკუმენტი წარუდგინეს. მორიგების მიხედვით, საკრებულო თანახმაა, რომ მომჩივანმა დეპუტატებმა, საკრებულოში ფრაქციები შექმნან.

[თამუნა უჩიძე, ბორჯომი]