ბორჯომის საკრებულოს დეპუტატები ფრაქციების შექმნაზე მორიგდნენ

ბორჯომის საკრებულოს ექვსი დეპუტატი, სასამართლოს წესით, ორი ფრაქციის შექმნას ითხოვს. დღეს, 17 აპრილს, მათ საქმეზე გამართულ მორიგ სხდომაზე, მხარეებმა საკუთარი ინიციატივით, მოსამართლეს მორიგება წარუდგინეს. დოკუმენტის მიხედვით, საკრებულო თანახმაა, რომ მომჩივანმა დეპუტატებმა, საკრებულოში ფრაქციები შექმნან.

მოსამართლე გია ბერაიამ, დაახლოებით, ერთსაათიანი თათბირის შემდეგ, სასამართლოში მხარეებს განუცხადა, რომ იგი, დღეს, მათ მორიგებას ვერ დაამტკიცებდა: „მორიგების კანონიერება უნდა გადავამოწმო“.

„რა მიზეზით ამოწმებთ მორიგების კანონიერებას?“ – ჰკითხა მოსამართლეს მოსარჩელე მხარემ.

„სასამართლოს მიზეზებს არ ეკითხებიან, თუ წინააღმდეგი ხართ, გადაწყვეტილებას რომ გამოვაცხადებ, გაასაჩივრეთ“, – უპასუხა მოსამართლემ.

ბორჯომის საკრებულოს დეპუტატები მორიგებაზე მას შემდეგ შეთანხმდნენ, რაც საკრებულოს თავმჯდომარე, ზაზა ჩაჩანიძე გადააყენეს. თუმცა, მორიგებაზე თანახმა, არც ჩაჩანიძის შემდეგ არჩეული თავმჯდომარე გიორგი გოგიჩაიშვილია: „მე ვუთხარი, რომ გადაწყვეტილებას მივიღებ იმის მიხედვით, რასაც სასამართლო გადაწყვეტს. მორიგებაზე თანახმა არ ვარ“.

მორიგების დოკუმენტს ხელს, საკრებულოს წარმომადგენელი, იურისტი ირმა გელაშვილი და მოსარჩელე მხარის ადვოკატი აწერს.

„რწმუნებულება მაქვს საკრებულოდან და არ არის სავალდებულო მორიგებაზე თანახმა იყოს თავმჯდომარე. ამაზე საკრებულოს დეპუტატების უმრავლესობა შეთანხმდა“, – გვითხრა გელაშვილმა.

მომავალ სხდომაზე გაირკვევა მოსამართლე მორიგებას დაამტკიცებს თუ არა. თუმცა, ჯერ სასამართლოს სხდომის თარიღი არ დანიშნულა.

სასამართლოში ის დეპუტატები დავობენ, რომლებსაც საკრებულოში ორი ფრაქციის „ქართული ოცნება – კონსერვატორები“ და „ქართული ოცნება – მრეწველების“ შექმნაზე უარი ეთქვათ. მათ შორის არის ისეთი სამი დეპუტატი, ანდრო გედიაშვილი, ივანე შალუტაშვილი და ოთარ არბოლიშვილი, რომლებმაც ფრაქციების შექმნის მიზნით, „ოცნების“ პარტია დატოვეს. იმისთვის, რომ საკრებულოში მეტი ფრაქცია შექმნილიყო ანდრო გედიაშვილი „კონსერვატორებში“ გადავიდა, ხოლო ივანე შალუტაშვილი და ოთარ არბოლიშვილი „მრეწველებში“.

თუმცა, მათ სწორედ ამ მიზეზით საკრებულოს უმრავლესობამ, (რომელიც ოპოზიციური პარტიების წარმომადგენლებისგან არის დაკომპლექტებული) ფრაქციების დარეგისტრირებაზე უარი უთხრა.

[ლუბა გიორგაძე, ბორჯომი]