დაპირისპირება ‘რესპუბლიკელების’ ახალციხის ორგანიზაციაში

‘რესპუბლიკელების’ ახალციხის რაიონული ორგანიზაციის კომიტეტმა დღეს გაავრცელა ოფიციალური განცხადება, რომელშიც ნათქვამია, რომ პარტიის ახალციხის რაიონული ორგანიზაციის თავმჯდომარის მისამართით 25 მაისს გამოთქმული ბრალდებები აბსურდულია და ემსახურება არამხოლოდ თავმჯდომარის, არამედ პარტიის დისკრედიტაციას.

შეგახსენებთ, რომ მიმდინარე წლის 25 მაისს, კოალიცია ‘ქართული ოცნების’ წევრებმა გამართეს საპროტესტო აქცია ახალციხის მუნიციპალიტეტის საკრებულოს თავმჯდომარის ოლეგ სანდროშვილის გადადგომის მოთხოვნით. აქციას ‘რესპუბლიკელებიც’ ესწრებოდნენ, რომლებმაც განაცხადეს, რომ დაკავებული პოსტი ასევე უნდა დატოვოს მუნიციპალიტეტის გამგებლის მოადგილემ თამარ გოგოლაძემ.

- ‘ჩვენი უფლებები დაირღვა, ასი პროცენტით თუ ირღვეოდა ”ნაციონალების” დროს, დღეს ორასი პროცენტით ირღვევა. ჩვენ ვიცავ ჩვენ უფლებებს. ჩვენი პარტიის ლიდერმა, ქალბატონმა თამარ გოგოლაძემ, რომელიც გამგებლის მოადგილეა, ასეთი პასუხი გაგვცა, რომ ის საკუთარი კარიერის მოწყობითაა დაკავებული და ჩვენი სამსახურების გამო არაფერს გააკეთებს’, - განაცხადა ‘რესპუბლიკური პარტიის’ წევრმა კახაბერ ლომიძემ აქციაზე.

‘აქციაზე ‘რესპუბლიკური პარტიის’ წევრების (სამი წევრი) დასწრება არ იყო შეთანხმებული ორგანიზაციასთან, შესაბამისად, მათ მიერ გამოხატული პოზიცია არ ასახავს რეგიონული ორგანიზაციის პოზიციას. ‘რესპუბლიკური პარტიის’ ახალციხის რაიონული ორგანიზაციის თავმჯდომარის მისამართით გამოთქმული ბრალდებები აბსურდულია, ემსახურება არამხოლოდ ღავმჯდომარის, არამედ პარტიის დისკრედიტაციას’, - ნათქვამია კომიტეტის მიერ გავრცელებულ განცხადებაში.

[ნინო ნარიმანიშვილი, ახალციხე]