კახა სამხარაძე : ‘ვაკანტურ ადგილებზე თანამშრომლებს დავიმატებთ’

სამცხე–ჯავახეთის ახლადდანიშნული გუბერნატორი კახა სამხარაძე სამხარეო ადმინისტრაციაში საკადრო ცვლილებებს არ გეგმავს, თუმცა ამბობს, რომ შესაძლოა, თანამშრომლებს ფუნქციები სხვაგვარად გადაუნაწილოს. მისი თქმით, გუნდი, რომელიც დახვდა, წარმატებულად მუშაობს, მაგრამ ვაკანტურ პოზიციებს შევსება სჭირდება.

„თავისუფალია მოადგილის ერთი, ასევე ადმინისტრაციის უფროსის პოზიცია, გარდა ამისა გვაქვს სპეციალისტების ადგილებიც. ჯამში, ოთხი, ან ხუთი ვაკანტური ადგილი გვექნება. ამ პოზიციებზე შესაძლოა ვინმე დავიმატოთ“, – ამბობს "სამხრეთის კარიბჭესთან" ინტერვიუში სამხარაძე.

გუბერნატორის მოადგილედ რჩება გიორგი მიქელაძე. რაც შეეხება მეორე მოადგილის პოზიციას, სამხარაძე ამ მიმართულებით ისეთი პირის დანიშვნას გეგმავს, რომლესაც ინფრასტრუქტურულ საკითხებში მუშაობის დიდი გამოცდილება აქვს.

„ჯერ არ მყავს მოაზრებული ვინ იქნება. შესაძლოა ადგილობრივი იყოს. ინფრასტრუქტურული პროექტების განხორციელება ჩვენი პრიორიტეტია, ამიტომ თუ მოადგილეს დავიმატებ, მინდა პროფესიონალი იყოს ინფრასტრუქტურულ საკითხებში“, – ამბობს სამხარაძე.

კახა სამხარაძე სამცხე–ჯავახეთის სამხარეო ადმინისტრაციაში მუშაობას ორ აპრილს შეუდგა. იგი რეგიონში შიდა ქართლის გუბერნატორის პოზიციიდან გადმოიყვანეს. სამხარაძემ ამ თანამდებობაზე აკაკი მაჭუტაძე ჩაანაცვლა, მაჭუტაძემ კი შიდა ქართლის გუბერნატორის პოზიცია დაიკავა.

[თამუნა უჩიძე, ახალციხე]