სამცხე–ჯავახეთის ახლადდანიშნული გუბერნატორი თანამშრომლებს ეცნობა

კახა სამხარაძე სამხარეო ადმინისტრაციაში დღეს, 14:00 საათისთვის მივიდა. პირველი სამუშაო დღე მან თანამშრომლების გაცნობით და მათთან შეხვედრით დაიწყო.

„ახლა მოვედი, თანამშრომლებს უნდა გავეცნო, ჯერ ვერაფერს გეტყვით“, – განუცხადა სამხარაძემ "სამხრეთის კარიბჭეს"

შეგახსენებთ, რომ სამცხე–ჯავახეთის ყოფილი გუბერნატორის აკაკი მაჭუტაძის შიდა ქართლის გუბერნატორად და შიდა ქართლის გუბერნატორის კახა სამხარაძის სამცხე–ჯავახეთის გუბერნატორად დანიშვნის შესახებ ბრძანებები გასულ კვირას დაიწერა.

სამცხე–ჯავახეთში ახლდდანიშნული გუბერნატორი კახა სამხარაძე შიდა ქართლის გუბერნატორი 2017 წლის თებერვლიდანაა. მანამდე იგი, 2015–2016 წლებში, „ქართული ოცნების“ რეგიონული კურატორი იყო სამცხე–ჯავახეთში, შიდა ქართლსა და მცხეთა–მთიანეთში. 2014-2015 წლებში კი თეთრიწყაროს მუნიციპალიტეტში გამგებლის პირველი მოადგილე იყო. სხვადასხვა დროს, ეკავა საპასუხისმგებლო თანამდებობები – ბაქო-თბილისი-ჯეიჰანი/ბაქო-თბილისი-ერზრუმი ნავთობისა და გაზის მილსადენების მშენებლობის პროექტში, ასევე, იყო USAID-ის მიერ დაფინანსებული, ჰუმანიტარული დახმარების პროგრამის მენეჯერი.

[ლუბა გიორგაძე, სამცხე–ჯავახეთი]