ადმინისტრაციული სამსახურები პრემიების ოდენობას არ ასაჯაროებენ

საჯარო ინფორამციის მოთხოვნით ”სამხრეთის კარიბჭემ” ახალციხის მუნიციპალიტეტის გამგეობასა და საკრებულოს, ასევე სამხარეო ადმინისტრაციას მიმართა. 14 მაისის განცხადებით გაზეთი გასული წლის იანვრიდან დღემდე თანამშრომლებზე გაცემული პრემიების ოდენობის შესახებ ითხოვდა ინფორმაციას.

სამივე სამსახურიდან მიღებული პასუხი ზოგადია. არცერთ წერილში, არცერთი თანამშრომლის ვინაობა და თანხის ოდენობა მითითებული არაა.

გუბერნატორის ადმინისტრაციის თანამშრომლებზე 2011 წელს გაცემულია პრემია 104'555 ლარის ოდენობით, ხოლო 2012 წლის იანვარ-აპრილში - 44'970.

რაც შეეხება საკრებულოს, 2011 წელში ერთდროული ფულადი ჯილდო - პრემია გაცემულია სამჯერ. მათ შორის ორი - ერთი თვის თანამდებობრივი სარგოს განაკვეთების 100% ოდენობით , ერთი - 50 %-ის ოდენობით. 2012 წლის განმავლობაში ერთდროული ფულადი ჯილდო - პრემია გაცემულია ერთხელ, ერთი თვის თანამდებობრივი სარგოს განაკვეთების 100 %-ის ოდენობით.

”გამგეობის თანამშრომლებზე 2011 წლის აპრილსა და დეკემბერში გაიცა პრემია თანამდებობრივი სარგოს 100 %-ის ოდენობით, აგვისტოში 50 % და, 2012 წლის მაისში - 100 %”, - ვკითხულობთ გამგეობიდან მოსულ პასუხში, რომელიც 21 მაისით თარიღდება.

[თამუნა უჩიძე, ახალციხე]