რა ოდენობის პრემია და დანამატი გაიცა ახალციხის სასამართლოს თანამშრომლებზე

„სამხრეთის კარიბჭეს“ მიერ გამოთხოვილი ინფორმაციის მიხედვით, 2019 წელს ივლისის ჩათვლით, ახალციხის რაიონულ სასამართლოში, სადაც ადიგენის, ასპინძისა და ბორჯომის მაგისტრატი სასამართლოებიც შედის, პრემია არ გაცემულა.

2018 წელს, სასამართლოს აპარატში სახელფასო დანამატი ორჯერ გაიცა. პირველად მარტში - 440 ლარის ოდენობით, მეორედ კი დეკემბერში - 33 420 ლარი.

2017 წელს თანამშრომლებმა პრემია ოთხჯერ მიიღეს: მარტში - 27 630 ლარი, ივნისში - 16 840, სექტემბერში - 26 050, დეკემბერში კი 44 225 ლარი.

საჯარო მოხელის ანაზღაურება მოიცავს სამ ძირითად ელემენტს: თანამდებობრივ სარგოს, სახელფასო დანამატსა და შეფასებაზე ორიენტირებულ პრემიას.

საჯარო მოხელის თანამდებობრივი სარგო წარმოადგენს საჯარო სამსახურში დაკავებული პოზიციისათვის კანონმდებლობით დადგენილი ანაზღაურების ძირითად ნაწილს.

სახელფასო დანამატი წარმოადგენს, საჯარო სამსახურში შესრულებული დამატებითი სამუშაოსთვის სახელმწიფო ბიუჯეტიდან გამოყოფილ დამატებით ანაზღაურებას.

ხოლო პრემია არის საჯარო მოსამსახურის მიერ საჯარო სამსახურში განხორციელებული საქმიანობის შეფასების შედეგების მიხედვით განსაზღვრული წახალისების ფორმა.

[თორნიკე ზაზაძე, ახალციხე]