ბორჯომის მერიამ საკრებულოს დასამტკიცებლად ისევ გაზრდილი ხელფასები წარუდგინა

დღეს, 31 იანვარს, ბორჯომის მუნიციპალიტეტის საკრებულოს, თვითმმართველობის თანამშრომლების ხელფასების რეგულირების საკითხი უნდა დაემტკიცებინა, თუმცა სხდომა ქვორუმის არ არსებობის გამო ვერ შედგა. საკრებულოში ორი ოპოზიციონერი დეპუტატი ირმა ზედგინიძე და მამუკა ლურსმანაშვილი ვერ გამოცხადდნენ, დეპუტატების თქმით, მიზეზი მათი ჯანმრთელობის მდგომარეობის გაუარესებაა.

სხდომა ხვალ, პირველ თებერვალს გაიმართება. საკრებულოს მსჯელობა ისევ თვითმმართველობის თანამშრომლების გაზრდილ ხელფასებზე მოუწევს. როგორც „სამხრეთის კარიბჭეს“ ბორჯომის მერიაში განუცხადეს, მათ დეპუტატებს ისევ ის სახელფასო ნუსხა გადაუგზავნეს, რის დამტკიცებაზეც 18 იანვარს უარი მიიღეს. გამონაკლისი მხოლოდ მერის ლევან ლიპარტიას შრომითი ანაზღუარებაა, მისი ხელფასი 2 450 ლარი იქნება.

„სახელფასო ფონდის ოდენობას ფინანასთა სამინისტრო ადგენს, წელს ეს ფონდი გაზრდილია. ჩვენ კი სახელფასო სარგოები ამ ფონდის ოდენობის ფარგლებში უნდა განვსაზღვროთ. კანონმდებლობის მიხედვით, საერთოდ განსაზღვრულია საჯარო მოხელის საბაზისო თანხა, რაც შემდეგ შესაბამის კოეფიციენტებზე მრავლდება და საბოლოოდ, ამა თუ იმ საჯარო მოხელის ხელფასის ოდენობა განისაღვრება“, – ამბობს ბორჯომის მუნიციპალიტეტის მერიის საფინანსო–საბიუჯეტო სამსახურის უფროსი მაია პაიჭაძე და ამატებს, რომ კანონით ხელფასის კლება დაუშვებელია.

შეკითხვაზე, სამართლებრივად რამდენად დასაშვებია ის, რომ ხელფასები საჯარო მოხელეებს არ დააკლდეთ, თუმცა იგივე ოდენობა დარჩეთ, პაიჭაძე გვპასუხობს: „რატომ უნდა დარჩეთ იგივე, იმიტომ, რომ ასე საკრებულოს უნდა?!“

მისი თქმით, გადაწყვეტილება იმის შესახებ, რომ მერის ხელფასი უცვლელი ყოფილიყო, თავად მერმა ლევან ლიპარტიამ მიიღო: „ამ გადაწყვეტილების მოტივი ალბათ ისევ საკრებულოა“.

შეგახსენებთ, რომ 22 იანვარს ბორჯომის მუნიციპალიტეტის მერიაში ხეფლასების დარიცხვა ვერ შეძლეს, მიზეზი ის იყო, რომ საკრებულოს ხელფასების რეგულირების საკითხი, ასევე საშტატო ნუსხა დამტკიცებული არ ჰქონდა. სირთულე კი იმან შექმნა, რომ 18 იანვარს გამართულ საკრებულოს სხდომაზე მერია ხელფასების გაზრდილი ოდენობით დამტიცებას ითხოვდა, ამას კი დეპუტატებმა მხარი არ დაუჭირეს.

[თამუნა უჩიძე, ბორჯომი]