ახალციხის მერია წარმატებული ახალგაზრდების წახალისებას იწყებს

როგორც მერიაში განმარტავენ, ჯილდო გადაეცემა როგორც მერიის მიერ ორგანიზებულ ღონისძიებებში გამარჯვებულებს, ასევე, მათ, ვინც რაიმე ტიპის ფესტივალებსა და ტურნირებში გაიმარჯვებს.

ახალციხის მუნიციპალიტეტში მცხოვრები, ნებისმიერი წარმატებული სპორტსმენი 150 ლარით დასაჩუქრდება. საქართველოს ჩემპიონატში პირველ ადგილზე გასული 400 ლარს მიიღებს, მეორე ადგილის მფლობელს 300 ლარი გადაეცემა, ხოლო მას, ვინც მესამე ადგილს დაიკავებს, 200 ლარით დაასაჩუქრებენ. ჯილდოს გადასცემენ წარმატებულ ვეტერან სპორტსმენებსაც – დაახლოებით 200 ლარის ოდენობის.

დაჯილდოვდებიან სასკოლო თეატრალურ ფესტივალებში გამარჯვებული გუნდებიც. პირველი ადგილის მფლობელი – 500 ლარით, მეორე ადგილი – 300 ლარით, ხოლო მესამე ადგილზე გასული გუნდი – 200 ლარს მიიღებს.

გარდა ამისა, წლის განმავლობაში მერია რამდენიმე ღონისძიებას გეგმავს. მათ შორის: ესეების კონკურსი -"ჩემი პროფესია", სადაც პირველი ადგილის მფლობელი 200 ლარს მიიღებს. მეორე ადგილზე გასულს – 150 ლარი, ხოლო მესამე ადგილის მფლობელს 100 ლარი გადაეცემა.

იგეგმება ფოტოკონკურსის მოწყობაც. აქ პირველი ადგილი – 300 ლარი, მეორე ადგილი – 200 ლარი, ხოლო მესამე ადგილი – 100 ლარია.

მერია ჩაატარებს სპორტულ შეჯიბრებებსაც. გუნდი, რომლიც მუნიციპალიტეტის ან რეგიონის მასშტაბით გამართულ ტურნირში გაიმარჯვებს, 300 ლარს მიიღებს. 200 ლარი იქნება გათვალისწინებული მეორე და 100 ლარი მესამე ადგილისთვის.

გაცილებით მაღალია საპრიზო ფონდი იმ ტიპის გუნდებისთვის, სადაც 6–ზე მეტი მონაწილეა.

I ადგილი – 500 ლარი;
II ადგილი – 300 ლარი;
III ადგილი – 200 ლარი.

ახალციხის მუნიციპალიტეტის მერის ზაზა მელიქიძის განმარტებით დაჯილდოვდება ყველა, ვინც გამარჯვებას მოიპოვებს: „აუცილებელია წარმატებულ ახალგაზრდებს სტიმული მივცეთ იმისთვის, რომ ჩვენი რეგიონიდან არ წავიდნენ“.

[თინათინ ზაზაძე, ახალციხე]