ქალები პოლიტიკაში და უმცირესობები არჩევნებში – საიას კვლევების შედეგები

„ახალგაზრდა იურისტთა ასოციციამ“, იმის შესახებ, თუ რამდენი ქალი დასაქმდა ადგილობრივი თვითმმართველობის ორგანოებში 2017 წლის არჩევნების შემდეგ, კვლევა ჩაატარა.

საიას გორის ოფისის წარმომადგენლის ქეთი ბებიაშვილის თქმით, 2017 წლის ადგილობრივი თვითმმართველობის არჩევნების შემდეგ ნათელი გახდა, რომ ბუნებრივი გზით, პოლიტიკაში ქალთა მონაწილეობის ზრდა ვერ ხერხდება: „რომ ვუყურებ პოლიტიკური პარტიების საქმიანობას, ძირითადად ქალები აქტიურობენ. ისინი არიან კოორდინატორები, მობილიზატორები, ასე ვთქვათ, არჩევნებს ქალები იგებენ, მაგრამ ხელისუფლებაში მოდიან კაცები“.

ბებიაშვილის თქმით, 2017 წლის არჩევნების შემდეგად, ქალთა მონაწილეობა საარჩევნო პროცესებში, წინა ადგილობრივი თივთმმართველობის არჩევნებთან შედარებით, დაახლეობით, 1.5%–ით გაიზარდა და 13,46% შეადგინა.

კვლევის მიხედვით, 64 საკრებულოდან 22–ში მაჟორიტარული წესით არჩეული ქალების რაოდენობა ნულია.

„სახელმწიფო ბიუჯეტიდან დაფინანსებული 18 პოლიტიკური პარტიიდან გენდერულ დანამატს, მხოლოდ, 15 პოლიტიკური პარტია იღებს, თუმცა, ადგილობრივ თვითმმართველობებში ქალთა რაოდენობა კვლავ დაბალია. არადა კვლევისას აღმოჩნდა, რომ რეგიონში პოლიტიკური პარტიების წარმომადგენელთა 87% ისურვებდა მეტ ქალს საკუთარი რაიონის საკრებულოში“, – ამბობს ბებიაშვილი.

დღეს გამართულ შეხვედრაზე, საქართველოში არსებული ეთნიკური უმცირესობების საარჩევნო ქცევასთან დაკავშირებით, „ახალგაზრდა იურისტთა ასოციაციის“ მკვლევარმა გიორგი გობრონიძემ ისაუბრა: „კვლევის მიზანი ეთნიკური უმცირესობების საარჩევნო ქცევის შესწავლა იყო. გვინდოდა დაგვენახა, თუ რამდენად არიან უმცირესობების წარმომადგენლები საარჩევნო პროცესებში ჩართულები და ასევე, გაგვერკვია ამ ჩართულობის ხარისხი“.

კვლევა საქართველოს ხუთ მუნიციპალიტეტში ახმეტაში, ახალქალაქში, ნინოწმინდაში, მარნეულსა და გარდაბანში ჩატარდა. საბოლოოდ გამოვლინდა, რომ პოლიტიკური პარტიების შესახებ ეთნიკური უმცირესობების ინფორმირების ხარისხი დაბალია, ასევე, დაბალია მათი მხრიდან ნდობა პოლიტიკური პარტიების მიმართ.

„ეთნიკური უმცირესობებისათვის, ასევე, პრობლემას წარმოადგენს ენის ბარიერი. მათ არ იციან ქართული კარგად, ამიტომ საქართველოში მიმდინარე მოვლენების შესახებ ინფორმაციას რუსული საინფრომაციო სააგენტოებიდან იღებენ, რაც ხშირად სიმართლეს არ შეესაბამება“.

კვლევისთვის გამოკითხვები ინტერვიუების და დისკუსიების ფორმით ტარდებოდა.

საია კვლევების პრეზენტაციას ყველა რეგიონში გამართავს.

[მარიამ ბარძიმაძე, ახალციხე]