”გენდერული თანასწორობა პოლიტიკურ პროცესებში”

შეხვედრა, რომელიც ახალციხის დემოკრატიული ჩართულობის ცენტრში გაიმართა, სამცხე-ჯავახეთის ექვსივე მუნიციპალიტეტში მცხოვრები ქალბატონები ესწრებოდნენ. ასევე, დღევანდელ დისკუსიაში მონაწილეობა გენდერულ თემაზე მომუშავე არასამთავრობო ორგანიზაციების წარმომადგენლებმა და რეგიონში მცხოვრებმა ეთნიკური უმცირესობების წარმომადგენლებმა მიიღეს.

შეხვედრის მონაწილეებმა იმსჯელეს პოლიტიკაში ქალის ჩართულობის მექანიზმზე და განიხილეს, რამდენადაა დარღვეული გენდერული ბალანსი არჩევნების დროს და რატომ არის საქართველოს პარლამენტის წევრთა შორის მამაკაცების უმეტესობა. გარდა ამისა, ისაუბრეს რატომ ანიჭებენ უპირატესობას მამაკაცებს სხვადასხვა თანამდებობაზე დანიშვნისას და რა შემთხვევებში ირღვევა გენდერული ბალანსი ქალებთან მიმართებაში. რა უნდა გააკეთონ ქალბატონებმა იმისათვის, რომ პოლიტიკაში უფრო აქტიურები გახდნენ.

”ჩვენი ქსელის მიზანია 2014 წლის ადგილობრივ თვითმმართველობის არჩევნებში რაც შეიძლება მეტმა ქალმა მიიღოს მონაწილეობა. ამისათვის შეხვედრებს ქალბატონებთან ვმართავთ. დღეს მათ გავაცანით ჩვენი სამოქმედო გეგმები, მოვისმინეთ მათი მოსაზრებები, მისწრაფებები და პრობლემები”, - ამბობს ”გენდერულ თანასწორობის ეროვნული ქსელის” სამცხე-ჯავახეთის კომიტეტის თავმჯდომარე მარინა მოდებაძე.

მისივე თქმით ”ქალთა მოძრაობამ” შეიმუშავა კანონპროექტი, რომელსაც უახლოეს მომავალში წარადგენენ. აღნიშნული პროექტი ითვალისწინებს, რომ პოლიტიკური პარტიების წევრთა 30 პროცენტს მანდილოსნები უნდა წარმოადგენდნენ. კანონის მიღების შემთხვევაში, თუ ამ წესს არ დაიცავენ არჩევნებში მისაღებად რეგისტრაციას ვერ გაივლიან.

შეხვედრის მონაწილეები ამბობენ, რომ მსგავსი სახის შეხვედრებით ისინი საკუთარ უფლება-მოვალეობებზე მეტ ინფორმაციას იღებენ.

”ვცდილობ აქტიურად ჩავერთო მსგავს შეხვედრებზე, რადგან ჩვენს უფლებებზე ბევრ რამეს გავიგებთ. მე სამწუხაროდ ადგილობრივი თვითმმართველობის არჩევნებზე მონაწილეობას არ ვიღებ, თუმცა მნიშვნელოვანია, რომ პოლიტიკურ ცხოვრებაში ბევრი ქალი ჩაერთოს”, - ამბობს ადიგენის საჯარო სკოლის პედაგოგი მარინა ზაზაშვილი.

[ნუკა სტეფნაძე, ახალციხე]