71 წლის ქალი ამ დრომდე გამომწყვდეულია

71 წლის ჯულიეტა გასპარიანი ამ დრომდე გარეთ გამოსვლას ვერ ახერხებს. ის ერთადერთი შესასვლელი, რომლითაც ხანდაზმული სარგებლობდა ამოშენებულია.

დაზარალებული ქალბატონის სანახავად და ვითარების გასარკვევად ადგილობრივი თვითმართველობის წარმომადგენლები შუადღისთვის მივიდნენ. გამგებლის მოადგილის მალხაზ ჟუჟუნაძის განმარტებით, პირველ რიგში უნდა გაიხსნას კარი, რათა ქალბატონმა გარეთ გამოსვლა შეძლოს და მიეცეს ნორმალური ცხოვრების საშუალება. ჟუჟუნაძე საკითხში უკეთ გარკვევის მიზნით პოლიციასაც დაუკავშირდა.

- ”აღმოჩნდა რომ აღნიშნული ბინა ოთხ მეპატრონეზეა გაყოფილი. გასარკვევია, ვის რა ფართი უკავია. საქმის მოკვლევა ახალციხის რაიონის პოლიციის სამმართველო, უკვე დაიწყო”, - ამბობს ჟუჟუნაძე.

მისი თქმით, როგორც უბნის ინსპექტორთან საუბრის შემდეგ გაირკვა საქმეზე გამოძიება გრძელდება: ”გადაწყვეტენ აღიძრება საქმე თუ გადაეგზავნება სასამართლოს და შესაბამისად მოხდება რეაგირება”.

თვითმმართველობის წარმომადგენლებმა და პოლიციის თანამშრომლებმა საუბრის შემდეგ კლდიაშვილის #20-ში მცხოვრები ერთერთი მეპატრონე ანდრანიკ მკრტიჩიანი, რომელიც ბინის 1\4 ფლობს დაითანხმეს, რომ გახსნას კარი და გასპარიანს სარგებლობის საშუალება მისცეს, თუმცა 71 წლის ქალბატონი შეთავაზებაზე თანახმა არაა. გასპარიანი ითხოვს, რომ იმ გზით ისარგებლოს, რომელიც მკრტჩიანის საძინებელ ოთახზე გადის.

- ”საიდანაც მთავაზობენ გასასვლელს ტუალეტი აქვთ და ვიწრო კარებია,”-აცხადებს გასპარიანი.

- ”მაინტერესებს საძინებელზე თუ გაივლის და კარს გავაღებ რაღაცა რომ დაიკარგოს პასუხს ვინ აგებს?! რამდენჯერმე შევთავაზე დერეფნით ესარგებლა, თუმცა უარი განაცხადა”, - კითხულობს მკრტიჩიანი.

რაც ბინის მეპატრონე ანდრანიკ მკრტიჩიანი და მისი მეუღლე შსს ახალციხს რაიონულ სამმართველოში დაკითხვიდან რამდენიმე წუთის წინ გამოვიდნენ.

სამმართველოს წარმომადგენლები გამოძიების დასრულებამდე კომენტარის გაკეთებისგან თავს იკავებენ.

შეგახსენეთ, რომ არასამთავრობო ორგანიზაცია ”ადამიანის უფლებათა საყოველთაო დეკლარაციისათვის” წარმომადგენლები დღეს დილიდან ვითარებას ადგილზე აკვირდებიან.

”რაც მოხდა საშინელებაა. ვეცდებით გასპარიანის უფლებები დავიცვათ და დროებით გავუხსნათ ის შესასვლელი, რომლითაც აქამდე სარგებლობდა. შემდეგ გასაჩივრდება ეს საკითხი და სასამართლო გამოიტანს განაჩენს ვის რა ეკუთვნის და რა არა. ”, - აცხადებს ორგანიზაციის სამცხე-ჯავახეთის რეგიონის კორდინატორი დავით ბერიძე და აქვე ამატებს, რომ დაინტერესდება ამ დრომდე პოლიციამ რატომ არ მოახდინა შესაბამისი რეაგირება.

კლდიაშვილი #20-ში სამეზობლო დავა ბინის თაობაზე გასულ წლებშიც იყო.

ამ წუთებში ადგილზე მობილიზებული არიან პოლიციის თანამშრომლები და ისინი კარის შემტვრევას ცდილობენ. მოვლენების განვითარების შესახებ ”სამხრეთის კარიბჭე” მოგვიანებით შეგატყობინებთ.

ამავე თემაზე შეგიძლიათ იხილოთ ვიდეო.

[თინათინ ზაზაძე,ნუკა სტეფნაძე - ახალციხე]