მალხაზ ჟუჟუნაძემ სამცხე-ჯავახეთის საოლქო პროკურატურას ყოფილი ხელისუფლების პერიოდში ჩადენილი დანაშაულის გამოძიების თხოვნით, 2012 წლის ნოემბერში, მიმართა, თუმცა ამ დრომდე შედეგი უცნობია.
ჟუჟუნაძე 2007 წლის ნოემბრის აქციების დროს დააკავეს. მას ბრალი სსკ-ის 260-ე მუხლით ედებოდა, რაც ნარკოტიკული ნივთიერების შეძენა-შენახვასა და გამოყენებას გულისხმობდა და 10 წლამდე თავისუფლების აღკვეთას ითვალისწინებს. მაშინ იგი ახალციხის საოლქო საარჩევნო კომისიის თავმჯდომარე იყო.
ჟუჟუნაძის თქმთ, დაკავების მიზეზი რეალურად ის იყო, რომ ნოემბრის აქციაზე მიმავალ „კონსერვატიული პარტიის“ წარმომადგენლებს, მის ბენზინგასამართ სადგურზე საწვავი ჩაუსხა. ასევე, ამავე პარტიის წარმომადგენელს ტელეფონზე საუბრისას უთხრა, რომ თბილისში აქციაზე წასვლას თავადაც აპირებდა: „საუბრიდან 15 წუთში პოლიციელები მოვიდნენ სახლში და დაიწყეს ჩხრეკა“.
„ჩხრეკაზე ძალიან ბევრი პოლიციელი იყო, მათ თან ახლდა ახალციხის რაიონული სამმართველოს მაშინდელი უფროსი ვახტანგ გეწაძეც. გასვლისას ვაზაში ერთი აბი სუბოტექსი სწორედ მან „აღმოაჩინა“, – ჩადებით კი ვინ ჩაუდო, ეს გამოძიების დასადგენია, გვიხსნის ჟუჟუნაძის ადვოკატი ნუგზარ სამარჯიშვილი.
ნარკოტიკული ნივთიერება მაშინ ჟუჟუნაძეს სისხლშიც აღმოუჩინეს, თუმცა, როგორც თავად ამბობს, პოლიციაში მიყვანისას წყალი დაალევინეს და ეს ნივთიერება მის ორგანიზმში სწორედ ამ გზით მოხვდა.
ჟუჟუნაძემ ციხეში 8 თვე დაყო. შემდეგ დანაშაული აღიარა, საპროცესო გარიგება გაუფრომეს და გამოვიდა. როგორც თავად აცხადებს, მაშინ სხვა გზა არ ჰქონდა.
ხელისუფლების შეცვლის შემდეგ, მან იუსტიციის და შინაგან საქმეთა მინისტრებს, ადამიანის უფლებათა დაცვის კომიტეტის თავმჯდომარესა და სამცხე-ჯავახეთის საოლქო პროკურატურას განცხადებებით მიმართა.
სამცხე-ჯავახეთის საოლქო პროკურატურაში აცხადებენ, რომ საქმეზე გამოძიება 2012 წლის 22 ნოემბერს დაიწყეს.
„დაიკითხნენ ოჯახის წევრები და სხვა მოწმეები, შედეგი საზოგადოებისთვის ცნობილი მალე გახდება“, - ამბობს სამცხე-ჯავახეთის საოლქო პროკურატურის საგამოძიებო ნაწილის უფროსი გიორგი ბახტაძე.
ამ დრომდე პროკურატურა იმ ადამიანის დაკითხვით, რომელმაც ვაზაში ნარკოტიკული საშუალება იპოვა არ დაინტერესებულა.
„ამ საქმეზე ჯერ არავის დავუკითხივარ“, - ამბობს ახალციხის რაიონული სამამმართველოს მაშინდელი უფროსი ვახტანგ გეწაძე.
არადა, როგორც ადვოკატი აცხადებს, ამ საქმეში ერთ-ერთი მნიშვნელოვანი დეტალი ჩხრეკაში სწორედ გეწაძის მონაწილეობა იყო: „როგორც წესი სამმართველოს უფროსები ჩხრეკაში მონაწილეობას არ იღებენ, თუმცა, კანონით ამის უფლება აქვთ. ასევე საინტერესოა ის, რომ ჩხრეკის ოქმში, სადაც მისი ყველა მონაწილე ფიქსირდება, გეწაძის შესახებ აღნიშნული არაფერი იყო, არადა წამალი გასვლისას, მან „აღმოაჩინა“.
კითხვაზე, რამდენად შესაძლებელია სამართლებრივად ის, რომ ექვსი წლის შემდეგ პროკურატურამ წამლის ჩადებისა და ჟუჟუნაძის ნარკოტიკით მოწამვლის ფაქტი დაადასტუროს, გვპასუხობს: „თუ პროკურატურა კრიტიკულად დაკითხავს ჩხრეკის მონაწილეებს ეს შესაძლებელია. ასევე, წარმოუდგენელი და დაუშვებელია, რომ მაშინ, როცა აბსოლიტურად ყველაფერს პოლიცია აკონტროლებდა, ჟუჟუნაძე რომელიც მათი თქმით, ნარკოტიკის მომხმარებელი იყო, საოლქო კომისიის თავმჯდომარედ დაენიშნათ“.
[თამუნა უჩიძე, ახალციხე]