ევანგელური ეკლესია კათოლიკეებს რელიკვიების დაწვის გამო სოლიდარობას უცხადებს

"სამხრეთის კარიბჭე" განცხადებას უცვლელად გთავაზობთ:

"შუა საუკუნეების ავტოდაფეებისა და 90-იანი წლების საქართველოს რელიგიური ექსტრემიზმის ტრადიციის შესაბამისად 2018 წლის 12 მარტს ვალეს წმიდა ნინოს სახელობის კათოლიკურ სამლოცველოში შეიჭრნენ, ლოცვის წინგები და ხატები გამოიტანეს და სამლოცველოს წინ დაწვეს. დაწვეს ისე, თითქოს რწმენას, ლოცვას, საღვთო წიგნებს ვიწრო რელიგიურ-პარტიული საზღვრები ჰქონოდეს.

ჩვენ, გამოვხატავთ ჩვენს სოლიდარობას ვალეს წმიდა ნინოს სახელობის კათოლიკური ეკლესიის მორწმუნეების, მათი წინამძღოლის, მიხაილ სურმავასადმი, აგრეთვე მეუფე ჯუზეპე პაზოტოსა და მთელი კათოლიკური თემისადმი საქართველოში.

ჩვენმა ეკლესიამ კარგად იცის სიწმიდეების დაწვით გამოწვეული სიმწარე. როდესაც 2002 წელს თბილისში დაგვწვეს ათასობით ბიბლია და სახარება, მხოლოდ იმის გამო, რომ ის წიგნები ჩვენ გვეკუთვნოდა, რომის კათოლიკე ეკლესიამ საქართველოში და მისმა წინამძღოლმა ჯუზეპე პაზოტომ უდიდესი სოლიდარობა გამოხატეს ჩვენი საკითხის მიმართ. დღეს ჩვენი ჯერია, მხარში დავუდგეთ კათოლიკე ეკლესიას და დავგმოთ მის მიმართ გამოჩენილი კიდევ ერთი ბარბაროსობა. საქარელოში რელიგიური სიბნელისა და სიძულვილის ხანა უნდა დამთავრდეს.

იმედი გვაქვს, რომ მსგავს ვანდალიზმს ყურადღების მიღმა არ დატოვებს საქართველოს სახელმწიფო და კომპეტენტური ორგანოები ყველაფერს თავის სახელს დაარქმევენ, რათა ამ ქვეყანაში კიდევ უფრო არ გაღრმავდეს შეუწყნარებლობის, დაუსჯელობის, უგულებელყოფის ის სატკივარი, რომელზეც ბევრი ადამიანი ჩივის. უფალს ვთხოვთ ყველა ჩაგრულს ნუგეში მისცეს, ხოლო მჩაგვრელს ქვის გული ამოუღოს და ადამიანისა უბოძოს".

შეგახსენებთ, რომ 12 მარტს, საღამოს, სოფელ ვალეში, წმინდა ნინოს მცირე სამლოცველოსთან, რომელშიც კათოლიკეები და მართლმადიდებლები წლებია ერთად ლოცულობენ, კათოლიკური ხატები და ლოცვის წიგნები დაწვეს. მომხდარს შინაგან საქმეთა სამინისტრო რელიგიური საქმიანობისთვის ხელისშეშლის მუხლით იძიებს.

[sknews.ge]