ვალეში კათოლიკეებმა ბზობის ლიტურგია რელიკვიების დაწვის ადგილიდან დაიწყეს [Photo/Video]

25 მარტს, 12:00 საათზე, ვალის კათოლიკე მრევლი, მსვლელობის დასაწყებად წმინდა ნინოს სახელობის სამლოცველოსთან შეიკრიბა.
ადგილობრივების განმარტებით, წლების განმავლობაში, კათოლიკეები მსვლელობას სოფელში მდებარე იმ სამლოცველოდან იწყებდნენ, რომელიც კათოლიკური ეკლესიის ნანგრევებზეა აშენებული, თუმცა 12 მარტს მომხდარი ფაქტის შემდეგ, გადაწყვიტეს მსვლელობა წმ. ნინოს სახელობის სამლოცველოდან დაეწყოთ და ღვთისმშობლის შობის სახელობის კათოლიკურ ტაძრამდე გაეგრძელებინათ.

სადღესასწაულო ლიტურგია ღვთისმშობლის შობის სახელობის კათოლიკური ტაძრის წინამძღვარმა მიხეილ სურმავამ დაიწყო – "კათოლიკეები, ვართ უმცირესობაში, მაგრამ ამით არ უნდა შევშფოთდეთ. ჩვენ ვართ, ვარსებობთ ვალეში. გისურვებთ, რომ ეს სიმბოლური პროცესია, ამ ეკლესიიდან, იყოს ნიშანი ქრისტიანობის ერთიანობისა და სიყვარულისა ერთმანეთის მიმართ".



მსვლელობის შემდეგ, წინამძღვარმა მორწმუნეების მიერ მიტანილი ბზის ტოტები აკურთხა და წესისამებრ, წირვა ღვთისმშობლის შობის სახელობის ტაძარში გააგრძელა.

შეგახსენებთ, რომ სოფელ ვალეში, წმინდა ნინოს სამლოცველოს გვერდით, 12 მარტს, საღამოს, კათოლიკური ხატები და წიგნები დაწვეს. სოფელში 600–მდე კომლი ცხოვორობს. მათი ნაწილი კათოლიკეა, ნაწილი კი მართლმადიდებელი. ამ სალოცავში ადგილობრივების მიერ მიტანილი რელიგიური სიწმინდეებია, როგორც კათოლიკური, ასევე მართლმადიდებლური. სალოცავში ორივე კონფესიის წარმომადგენლები დადიან.

ადგილობრივები აცხადებენ, რომ სოფელში რელიგიურ ნიადაგზე დაპირისპირება არასდროს ყოფილა და არც ეს სალოცავი გამხდარა როდესმე დავის მიზეზი.

მომხდარს სამართალდამცველები რელიგიური საქმიანობისთვის ხელისშეშლის, სისხლის სამართლის კოდექსის 166-ე მუხლით იძიებენ.











[თაკო ფეიქრიშვილი, ახალციხე]