ქართველ მუსლიმთა კავშირი ვალეში კათოლიკური რელიკვიების დაწვის ფაქტს გმობს

ქართველ მუსლიმთა კავშირის თავმჯდომარე ტარიელ ნაკაიძე ვალეში მომხდარ ფაქტთან დაკავშირებთ, განცხადებას ავრცელებს:

"ქართველი მუსლიმების სახელით ვგმობთ 2018 წლის 12 მარტს ვალეში მომხდარ ვანდალურ ფაქტს, კათოლიკური ლოცვის წიგნებისა და ხატების დაწვის თაობაზე.

ვფიქრობთ ეთნიკური და რელიგიური მრავალფეროვნება არის ჩვენი ქვეყნის მნიშვნელოვანი წარსული და ამავე დროს დიდი სიმდიდრე. მიგვაჩნია, რომ მისი რაიმე ფორმით ხელყოფა ნიშნავს ჩვენი ქვეყნის მომავალის განადგურებას და სამშობლოსადმი ღალატს.
მომხდარი არის ვანდალური ფაქტი და საჭიროებს სასწრაფო რეაგირებას. ხელისუფლების და შესაბამისი კომპეტენტური ორგანოების დროული მოქმედება და დროული სამართლებრივი შეფასება ერთისმხრივ ხელს შეიწყობს სამართლინობის აღდგენას და მეორესმხრივ საუკეთესო გამოსავალი იქნება მსგავსი ფაქტების პრევენციისთვის.

ვფიქრობთ სხვადასხვა რელიგიურმა ორგანიზაციებმა ღიად და კრიტიკულად უნდა შევაფასოთ ფაქტი და შესაბამისი მხარდაჭერა გამოვხატოთ საქართველოს კათოლიკე მრევლისადმი", – ნათქვამია განცხადებაში.

შეგახსენებთ, რომ 12 მარტს, საღამოს, სოფელ ვალეში, წმინდა ნინოს მცირე სამლოცველოსთან, რომელშიც კათოლიკეები და მართლმადიდებლები წლებია ერთად ლოცულობენ, კათოლიკური ხატები და ლოცვის წიგნები დაწვეს.

მომხდარს შინაგან საქმეთა სამინისტრო რელიგიური საქმიანობისთვის ხელისშეშლის მუხლით იძიებს.

[sknews.ge]