ვალეში კათოლიკური რელიკვიების დაწვის ფაქტს ომბუდსმენი შეისწავლის

მთავარი → სიახლე, საზოგადოება 13.03.2018

სახალხო დამცველის აპარატმა, სოფელ ვალეში, წმინდა ნინოს მცირე სამლოცველოსთან, კათოლიკური სიწმინდეების დაწვის ფაქტის შესწავლა დაიწყო.

ვალეში კათოლიკური რელიკვიების დაწვის ფაქტს ომბუდსმენი შეისწავლის

ფოტო: © შოთა გიქოშვილი

უწყებაში აცხადებენ, რომ მათი საკონტაქო პირი სამცხეში გულო კოხოძე უკვე ვალეში იმყოფება და მომხდარს იკვლევს.

საქართველოს სახალხო დამცველის აპარატი ამ ეტაპზე მომხდარის შეფასებისგან თავს იკავებს. ამბობენ, რომ განცხადებას მას შემდეგ გაავრცელებენ, როდესაც შესწავლა დასრულდება.

შეგახსენებთ, რომ 12 მარტს, საღამოს, სოფელ ვალეში, წმინდა ნინოს მცირე სამლოცველოსთან, რომელშიც კათოლიკეები და მართლმადიდებლები წლებია ერთად ლოცულობენ, კათოლიკური ხატები და ლოცვის წიგნები დაწვეს.

მომხდარს შინაგან საქმეთა სამინისტრო რელიგიური საქმიანობისთვის ხელისშეშლის მუხლით იძიებს.

ახალციხისა და ტაო კლარჯეთის მიტროპოლიტი თეოდორე ჭუაძე ვალეში მომხდარს ვანდალიზმად აფასებს და ამბობს, რომ სავარაუდოდ ამ ქმედების მიზანი ადგილობრივების დაპირისპირებაა.

[თამუნა უჩიძე, ახალციხე]