ვალეში კათოლიკური რელიკვიების დაწვის ფაქტზე შსს–მ ძიება დაიწყო

შინაგან საქმეთა სამინისტროში აცხადებენ, რომ გუშინ, 12 მარტს, ვალეში მომხდარი ფაქტის შესახებ ამ დრომდე მათთან შეტყობინება არ შესულა. თუმცა, მათ გამოძიება საინფორმაციო სააგენტოების მიერ გავრცელებული ინფორმაციის საფუძველზე დაიწყეს.

ძიება სისხლის სამართლის კოდექსის 166–ე მუხლით მიმდინარეობს, რაც პოლიტიკური, საზოგადოებრივი ან რელიგიური გაერთიანების შექმნისათვის, ან მისი საქმიანობისათვის ხელის შეშლას გულისხმობს. აღნიშნული ფაქტი ისჯება ჯარიმით, ან გამასწორებელი სამუშაოთი ვადით ერთ წლამდე, ან თავისუფლების შეზღუდვით ორ წლამდე, ანდა თავისუფლების აღკვეთით იმავე ვადით.

შეგახსენებთ, რომ 12 მარტს, დაახლოებით 18:00 საათზე, ვალეში მდებარე ქრისტიანულ სალოცავში, რომელშიც კათოლიკეები და მართლმადიდებლები მრავალი წელია ერთად ლოცულობენ, კათოლიკური ხატები და ლოცვის წიგნები დაწვეს.

[თამუნა უჩიძე, ახალციხე]