ბორჯომის საკრებულოს თავმჯდომარეს იმპიჩმენტს თანაპარტიელები უწყობენ

ბორჯომის საკრებულოს თავმჯდომარის იმპიჩმენტის მოთხოვნას ხელს „პატრიოტთა ალიანსის“ ორი დეპუტატი აწერს. ერთ–ერთი მათგანის, ტატიანა მარტინენკოს თქმით, ჩაჩანიძის იმპიჩმენტის ინიციატორები თავად არიან.

„საკრებულოს უმრავლესობაში „პატრიოტთა ალიანსის“ 11 დეპუტატი ვართ. ვფიქრობთ, რომ ჩვენი პასუხისმგებლობის წილი ბორჯომის სიმშვიდეზე, საკრებულოსა და მერიას შორის საქმიანი ურთიერთობის ჩამოყალიბებაზე, დიდია. ამიტომ, ჩვენი ინიციატივა იყო, შეცვლილიყო საკრებულოს თავმჯდომარე და „ოცნების“ დეპუტატებიც შემოგვიერთდნენ“, – ამბობს მარტინენკო.

მისი თქმით, ჩაჩანიძე საკრებულოს 15 ოპოზიციონერი დეპუტატის ხმებს პირადი მიზნებისთვის იყენებდა. მარტინენკო ფიქრობს, რომ ბორჯომის თვითმმართველობაში კრიზისი რეალურად ჩაჩანიძესა და „ოცნების“ წევრებს შორის არსებული პიროვნული დაპირისპირების შედეგია: „ამიტომ დავაყენეთ იმპიჩმენტის საკითხი და ჩაჩანიძის გადაყენების შემდეგ საკრებულოს თავმჯდომარის პოზიციაზე კანდიდატს პარტიის 11 წევრიდან შევარჩევთ. „ოცნებას“ არ ჰყავს იმდენი დეპუტატი საკრებულოში, რომ თავისი კანდიდატი გაიყვანოს და იმედია ჩვენსას მხარს დაუჭერენ“.

შეკითხვებზე, რამდენად იზიარებენ „პატრიოტთა ალიანსის“ სხვა წევრები ორი დეპუტატის მოსაზრებას და თუ იზიარებენ, განცხადებას ხელს რატომ არ აწერენ, მარტინენკო გვპასუხობს: „ამ განცხადებაში რამდენიმე დეპუტატის მოსაზრებაცაა გათავლისწინებული, თუმცა, ყველა აქ არ არის, ზოგი საავამდყოფოშია, ზოგი თბილისში“.

მარტინენკო ამბობს, რომ მათი გადაწყვეტილება „პატრიოტთა ალიანსთან“ შეთანხმებულია.

„ასეთ გადაწყვეტილებას რომ იღებდნენ, ბუნებრივია, პარტიას შეუთანხმდნენ. ეს არ არის ჩვენი ინიციატივა, რადგან არ ვერევით იქაურ ამბებში, მაგრამ შეგვითანხმეს“, – ამბობს „პატრიოტთა ალიანსის“ საზოგადოებასთან ურთიერთობის სამსახურის წარმომადგენელი მარიამ კუკავა.

შეკითხვაზე, რამდენად დემოკრატიული პროცესია, როცა საქართველოში საკრებულოს ერთადერთ ოპოზიციონერ თავმჯდომარეს ასევე ორი ოპოზიციონერი დეპუტატი იმპიჩმენტის მოწყობის ინიციატივით გამოდის, „პატრიოტთა ალიანსში“ გვპასუხობენ: „იმდენად დამოუკიდებლები არიან დეპუტატები, რომ ვისაც რა გადაწყვეტილება აქვს მიღებული, იმას ახმოვანებს“.

ბორჯომის მუნიციპალიტეტის საკრებულოში თავმჯდომარის ზაზა ჩაჩანიძის გადაყენებას კენჭს ფარულად 28 მარტს დანიშნულ სხდომაზე უყრიან. იმპიჩმენტისთვის საკრებულოს დეპუტატების სიითი შემადგენლობის ნახევარზე მეტი, ანუ 15 დეპუტატის ხმა სჭრიდება.

შეგახსენებთ, რომ საკრებულოში განცხადება, რომელსაც ხელს „ოცნების“ 13 და „პატრიოტთა ალიანსის“ ორი დეპუტატი აწერს, დღეს, 21 მარტს შევიდა.

[თამუნა უჩიძე, ბორჯომი]