გარდაცვლილი ჯარისკაცის მამა:'ექსპერტიზის დასკვნა გააყალბეს'

შვილმკვდარი მამა ამტკიცებს, რომ სამინისტრომ გარდაცვლილი ჯარისკაცის ექსპერტიზის დასკვნა იმის გამო გააყალბა, რომ აგვისტოს ომის მონაწილის ოჯახისათვის კომპენსაცია არ გადაეხადათ. საეჭვო ვითარებაში გარდაცვლილი სამხედროს ოჯახი თბილისი-სენაკი-ლესელიძის ავტომაგისტრალის გადაკეტვას, ქუთაისში მდებარე მესამე ქვეით ბრიგადასთან აქციების გამართვას და სამტრედიის მუნიციპალიტეტში არჩევნების ჩაშლას აანონსებს. ამის შესახებ გარდაცვლილის მამამ გია ჩაჩუამ იმერეთის მთავარი საინფორმაციო სააგენტო Topnews.com.ge-ს პრესკლუბში გამართულ პრესკონფერენციაზე განაცხადა.

"გაურკვეველია ჩემი შვილის გარდაცვალების მიზეზები. მაინტერესებს, რით გარდაიცვალა ჩემი შვილი. თუ ერთი კვირის ვადაში პასუხი არ მეცოდინება, პროტესტის ყველა ზომას მივმართავ," - ამბობს გია ჩაჩუა.

საქმეში არსებულ დარღვევებზე საუბრობს ადვოკატი ლედი ტუკვაძე. მისი თქმით, მტკიცებულებები თავდაცვის სამინისტროს განცხადებებს აბათილებს.

31 წლის მირზა ჩაჩუა, რომელიც სამტრედიის სოფელ გომის მკვიდრია, მიმდინარე წლის 9 ივლისს ახალციხის პოლიგონზე გარდაიცვალა. ოფიციალური ინფორმაციით, ჯარისკაცის გარდაცვალების მიზეზი ალკოჰოლი გახდა. გარდაცვლილის ოჯახი ექსპერტიზის დასკვნას არ ენდობა. მათი თქმით, მირზა ჩაჩუა, რომელიც ჯარში 11 წლის განმავლობაში მსახურობდა, ალკოჰოლურ სასმელს არ სვამდა. მათივე თქმით, თავდაცვის უწყებამ დასკვნა გააყალბა, რათა გარდაცვლილის ოჯახისათვის კომპენსაცია არ მიეცათ.

აღნიშნულ ინფორმაციას სააგენტო Topnews.com.ge ავრცელებს.